Horvatııa – Qazaqstan tennıs matchyndaǵy esepti teńestirgen Mıhaıl Kýkýshkın tilshiler saýalyna jaýap berdi.
- Birden aıtaıyn «Devıs kýbogynda» reıtıng degen eskerýsiz qalady. Borna Chorıch reıtıngte menen áldeqaıda bıik tur. Alaıda, bul jeke syn emes, bul ulttyq qurama oıyny. Munda maǵan kómektesetin adamdar kóp. Búkil el bolyp jolyma qarap otyrǵanda, eshkimdi jerge qaratqym kelmedi. Osy oı meni búgin alǵa jeteledi.
- Jeńiske jetýge ne sebep boldy? Qarsylasyńyzdan kútkendeı kúsh kóre aldyńyz ba?
- Árıne, oıynnyń bastapqy bóliginde ol óte agressıvti oınady. Biraq, keıinnen qum tósenishine jyldam beıimdelmegenin baıqatyp aldy. Borna ekeýimiz bir-birimizdi jaqsy bilemiz. Onyń ústine bul oıynǵa AQShtaǵy jarystan birge keldik. Ol jaqta hard tósenishte oınadyq. Al munda jaǵdaı basqasha. Kóbirek jattyǵyp, qol úıretip aldyq. Shamasy, qumǵa men jyldam úırenisken sekildimin. Onymen qosa ekinshi settiń taı-bregindegi jeńisim maǵan psıhologııalyq jeńildik jasady. Odan keıin úshinshi settiń basynda tipti árbir urǵan soqqym upaıǵa aınalyp jatty.