Dýshanbe qalasynda tájik-aýǵan shekarasyndaǵy áskerı boryshyn oryndaý kezinde 1995 jylǵy 7 sáýirde qaza tapqan qazaqstandyq jaýyngerlerdiń eskertkishine gúl shoqtaryn qoıý rásimi ótti, dep habarlaıdy Syrtqy ister mınıstrliginiń baspasóz qyzmeti.
Is-sharaǵa Tájikstan Respýblıkasy Qarýly Kúshteriniń Bas shtabynyń basshylyǵy, Tájikstan ardager-ınternasıonalıster odaǵynyń, elshilikterdiń áskerı attashat ókilderi, Shekara qyzmetiniń ardagerleri, jergilikti buqaralyq aqparat ókilderi, Qazaqstannyń Tájikstandaǵy Elshiliginiń qyzmetkerleri men olardyń otbasy músheleri qatysty.
О́z sózinde Qazaqstannyń Tájikstandaǵy Elshisi Nurlan Seıtimov óz ómirlerin qııa otyryp, qazaqstandyq jaýyngerler áskerı boryshtaryn batyrlyqpen oryndap, áskerı anttaryna adal bolyp qalǵandaryn atap ótti. Elshi qurbandardy este saqtap otyrǵan tájik halqyna alǵysyn bildirip, Qazaqstan óz batyrlaryn árdaıym joǵary dáripteıdi dep málimdedi.
Tájik tarapynan sóıleýshiler qaza tapqan qazaqstandyq jaýyngerler ózderi qorǵaǵan tájik halqynyń jadynda máńgi saqtalatynyn atap kórsetti, sondaı-aq Tájikstandaǵy qıyn jyldary qoldaý bildirgeni úshin qazaq halqyna jáne onyń basshylyǵyna zor rızashylyqtaryn jetkizdi.