Batys Qazaqstan oblysy Aqjaıyq aýdanynda «Men syıǵa tartqan dombyra» atty aksııa aıasynda mektepterge dombyra syılaý aksııasy júrip jatyr. Bir aptalyq aksııanyń alǵashqy úsh kúninde 27 mektepke ata-analar, demeýshiler 143 dombyra syıǵa tartyp úlgergen.
– Budan bólek, keıbir ata-analar óz balalaryna arnap úıge de dombyra satyp alyp jatyr eken. Munyń bári mektep oqýshylarynyń dombyraǵa qumarlyǵyn oıatyp, ulttyq ónerdi meńgerýine yqpal eteri sózsiz, – deıdi Aqjaıyq aýdandyq bilim bóliminiń basshysy Baqyt Ilııasqyzy.
Jalpy, batysqazaqstandyqtar Mahambet, Qurmanǵazy, Dáýletkereı, Dına, Mámen, Esjan, Qalı, Oqap sekildi kúıshi-dombyrashylardyń óz jerlesi ekenin maqtan tutady. Sondyqtan da bolar, óńirde kúı ónerin, dombyra aspabyn óskeleń urpaqqa keńinen nasıhattaý qolǵa alynǵan. Máselen, 2018 jyldyń basynan beri Aqjaıyq aýdanyndaǵy 46 mektepte úzilis kezinde kúı oınatylyp júr.
– Úzilis kezinde oınatý úshin 177 kúıdiń tizimin berdik. Mektepterde kúı oınatý úshin qajetti radıotoraby jelisi bar. О́zim de tyńdap júrmin, dombyranyń qońyr daýsy qulaqqa óte jaǵymdy, keremet áser etedi eken, – deıdi Baqyt Ilııasqyzy.
12 sáýirde Memleket basshysynyń «Bolashaqqa baǵdar: rýhanı jańǵyrý» atty maqalasy jaryq kórgenine týra bir jyl tolady. Dál osy kúni Aqjaıyq aýdany ortalyǵynda «Men syıǵa tartqan dombyra» aksııasy qorytyndylanyp, syılyqqa jınalǵan dombyra mektep ujymdaryna tapsyrylatyn bolady.
Qazbek QUTTYMURATULY
«Egemen Qazaqstan»
Batys Qazaqstan oblysy