Mańǵystaý oblystyq sotynda ótken keńeıtilgen keńes jumysynda 2018 jylǵy 3 aıda atqarylǵan sottardyń jumysy talqylandy. Keńes jumysyna Qazaqstan Respýblıkasy Joǵarǵy Sotynyń janyndaǵy Sottardyń qyzmetin qamtamasyz etý departamentiniń (Qazaqstan Respýblıkasy Joǵarǵy Sotynyń apparaty) basshysy Nurserik Sháripov, Mańǵystaý oblystyq sotynyń tóraǵasy Jaqsylyq Alanov bastaǵan sýdıalar korpýsy men sot qyzmetkerleri qatysty.
Is-shara barysynda óńirdegi sot tóreligin sapaly atqarý, zańdylyqty saqtaý, sottardyń jumysyn odan ári jetildirý máseleleri boıynsha alqa tóraǵalary, aryz-shaǵymdar boıynsha jáne sot ádebi jónindegi komıssııalardyń tóraǵalary, BAQ-pen baılanys jumysyn úılestirýshi sýdıa men sottar ákimshisiniń basshysy, sondaı-aq aýdandyq jáne oǵan teńestirilgen sottardyń tóraǵalary baıandama jasady.
Keńesti ashqan J.Alanov Elbasy usynǵan baǵdarlamalardan qoldaý tapqan sot júıesindegi reformalardyń mańyzdylyǵyn aıtyp, isterdi qaraý sapasyn odan ári arttyrý, jergilikti sottardyń jumysyndaǵy kemshilikterdiń aldyn alyp, sebepterine taldaý jasaý, zańdylyqtardaǵy jańashyldyqtardy barynsha qoldanýdy qamtamasyz etýdi tapsyrdy.
N.Sháripov sot tóreligin júzege asyrýdaǵy basym baǵyttardan quralǵan strategııalar portfelin keńinen tanystyrdy. Aǵymdaǵy jyldyń naýryzynan bastap respýblıka sottary azamattyq isterdi ońaılatylǵan tártipte qaraý elektrondyq formatqa kóshirilgenin, endi sýdıalar sot zaldaryna barmaı-aq, isti qarap sheshim shyǵaratyndyǵyn, jańa strategııalar boıynsha sýdıa kómekshisiniń jumys mehanızmi daıyndalyp jatqanyn aıtyp, kadr tapshylyǵy máselesin sheshýdiń ońtaıly tásilderimen bólisti. Bul kún saıyn ósken azamattyq isterdiń júktemesin azaıtyp, áýre-sarsańnyń, qaǵazbastylyqtyń aldyn alyp, halyq senimin qalyptastyrýdyń birden bir joly ekenin túsindirdi.
Odan ári Mańǵystaý oblystyq sotynyń qylmystyq ister jónindegi sot alqasynyń tóraǵasy Erjan Qarabaev esepti merzimde qaralǵan qylmystyq isterdiń statıstıkasy týraly baıandady. Aıtýynsha, 2018 jyldyń I toqsanynda jergilikti sottarda barlyǵy 461 tulǵaǵa qatysty 403 qylmystyq is qaralǵan, onyń ishinde – 354 tulǵaǵa qatysty aıyptaý úkimi bolsa, 2 aqtaý úkimi shyǵarylǵan. Jalpy oblys boıynsha qylmystyq ister sany ótken jylǵa qaraǵanda 45 iske kemigenimen, Beıneý, Túpqaraǵan, Munaıly aýdandyq sottarynda byltyrǵy jylmen salystyrǵanda qylmystyq ister kóbeıgen. Alqa tóraǵasy aýdandarda qylmystyq isterdiń artý sebebine taldaý jasaý qajettigine, medıasııanyń tıimdiligin túsindirý men qoldaný jumystaryna basymdyq berý kerektigine aıryqsha toqtaldy.
Al, azamattyq ister jónindegi sot alqasynyń tóraǵasy Nursapa Prımashev esepti merzimde azamattyq isterdiń eki esege, onyń ishinde Aqtaý qalasy №2 sotynda úsh esege kúrt artyp, sottardyń júktemesi kóbeıgenin atap aıtty. Sońǵy ýaqytta banktik kelisim sharttarǵa baılanysty ister sany 60 paıyzǵa artýyna baılanysty, bul máseleni ońtaıly sheshý týraly usynystar keltirdi. Statıstıkalyq málimetterge sáıkes, 2018 jyly 3 aıda Mańǵystaý oblysynyń aýdandyq jáne oǵan teńestirilgen sottaryna barlyǵy 8266 (2016 j. – 4234) ister men aryzdar túsken. О́tken jylmen salystyrǵanda aıaqtalǵan azamattyq ister sany artqan. 2017 jyly oblys boıynsha sottarda barlyǵy 4452 ákimshilik is qaralǵan. Oblys boıynsha 41 qylmystyq is, 227 azamattyq is medıasııa rásimimen aıaqtalǵan.Sondaı-aq, keńes sońynda sot júıesindegi elektrondy servısterdiń qoldanysy, tehnıkalyq jabdyqtaý máseleleri týraly málimetter aıtyldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy