Astanadaǵy «Otan-Ana» monýmentiniń irgesinde ornalasqan 1995 jyldyń 7 sáýirinde Qazaqstan Respýblıkasy IIM Ishki áskerleriniń (Ulttyq ulanynyń) tájik-aýǵan shekarasynda erlikpen qaza tapqan jaýyngerlerine arnalǵan eskertkishke gúl shoqtaryn qoıyp, erlikke taǵzym jasaýǵa Ulttyq ulan basshylyǵy men jergilikti atqarýshy bılik organdarynyń, áskerı ardagerler men qoǵamdyq uıym ókilderi jáne Astana qalasyndaǵy №25 mekteptiń kadet synybynyń oqýshylary qatysty.
Sondaı-aq shara aıasynda Ulttyq ulannyń Astana garnızonynyń jeke quramy saltanatty sherýde sap túzep, osydan 23 jyl buryn tájik-aýǵan shekarasyndaǵy shaıqasta kóz jumǵan sarbazdardy bir mınýt únsizdikpen eske alyp, erliktiń úlgisine aınalǵan azamattar jaıly estelikter aıtyldy.
Saltanatty jıynda sóz alǵan Qazaqstan Respýblıkasy Ulttyq ulany bas qolbasshysynyń tárbıe jáne áleýmettik-quqyqtyq jumystar jónindegi orynbasary, general-maıor Muhametqalı Satov óz Otanynan shalǵaıdaǵy ózge eldiń shekarasyn kúzete júrip, janyn pıda etken sarbazdar Táýelsiz Qazaqstandy ekstremızm men terrorızmniń qaýip-qaterinen qorǵaǵandyǵyn kópshiliktiń qaperine saldy.
– Olar táýelsizdigimizdiń nyǵaıýy jolyna óz ómirlerin arnady. Halyqaralyq deńgeıdegi qujattamalyq kelisimge saı, bizdiń sarbazdarymyz tájik-aýǵan shekarasyn qyraǵylyqpen kúzetip, baýyrlas eldiń tynyshtyǵyn qorǵady, óz elimizdiń qaýipsizdigin saqtady. Erliktiń jarqyn úlgisine aınalǵan erjúrek batyrlarymyzdy bizdiń otandastarymyz eshqashan umytpaıdy. Osy kúni Ulttyq ulannyń barlyq bólimderinde 17 sarbazdyń rýhyna taǵzym etken túrli is-sharalar uıymdastyrylýda. Sondaı-aq bıyl «Ishki ister organdary qyzmetshilerin áleýmettik qoldaý qory» arqyly marqum bolǵan sarbazdardyń otbasylaryna 100 myń teńge shamasynda qarjylaı kómek kórsetýdi qolǵa aldy. Osylaısha, materıaldyq-moraldyq qoldaý arqyly bizdiń memleketimiz Otan qorǵaý jolynda baqılyq bolǵan batyrlarymyzdy jas býynǵa úlgi-ónege etýde. Taǵzym etý arqyly jastardy elin, jerin súıýge baýlıtyn mundaı sharalar Memleket basshysy jarııalaǵan «Bolashaqqa baǵdar: rýhanı jańǵyrý» maqalasynda kórsetilgen baǵyt-baǵdarmen ózara úndes. Keleshekte biz osyndaı is-sharalar legin uıymdastyrýdy jalǵastyratyn bolamyz», dedi M.Satov.
Sondaı-aq eske alý jıynynda óz oıyn bildirgen azamattardyń qatarynda Qazaqstandyq IIO men Ulttyq ulan ardagerleri keńesiniń tóraǵasy, mılısııa general-maıory О́mirzaq Bolsambekov, «QR ishki ister organdary qyzmetkerlerin áleýmettik qoldaý qorynyń» tóraǵasy Kemel Jumashev, 1995 jylǵy 7 sáýir kúngi oqıǵanyń qatysýshysy, tájik-aýǵan shekarasynda qyzmet atqarǵan Ulttyq ulan ardageri Qaırat Sátbaev pen Astana qalasy № 25 orta mektebi kadet synybynyń oqýshysy Jandos Qumyrzaq boldy.
«Egemen-aqparat»