Shanhaı qor bırjasynda «Samuryq-Qazyna» ulttyq ál-aýqat qory» AQ-nyń (budan ári – Qor) Investor kúni ótti. Is-shara Qordyń 215 aktıvin básekelestik ortaǵa berýdi qarastyratyn Jekeshelendirý baǵdarlamasyn júzege asyrý aıasynda ótkizildi.
Qordyń energetıka, kólik pen logıstıka, taý-ken jáne munaı-hımııa salalaryndaǵy qorjyndyq kompanııalary ókilderi qytaılyq kásipkerlerge Qazaqstanǵa ınvestısııa salý múmkindikteri, kompanııalardyń damý qarqynyna baılanysty básekelestik artyqshylyqtary, óńirlik jáne jahandyq naryqtyń sharttary jaıly keńinen baıandady.
«Qordyń jáne onyń qorjyndyq kompanııalarynyń damýy Qazaqstandaǵy oń ózgeristerdiń negizinde júzege asyrylýda. Úkimet memlekettiń ekonomıkadaǵy úlesin azaıtyp, ondaǵy jeke sektordy belsendi túrde keńeıtýde jáne ekonomıkany jańǵyrtýda zor tabystarǵa qol jetkizýde. Men bizdiń qytaılyq áriptesterdi «Samuryq-Qazynanyń» munaı men gaz, kólik pen logıstıka, taý-ken men telekommýnıkasııa salalaryndaǵy jobalarǵa belsendi túrde ınvestısııa salýǵa shaqyramyn», - dep atap ótti «Samuryq-Qazyna» AQ Basqarma tóraǵasy Ahmetjan Esimov.
Qordyń 9 iri kompanııasynyń jeteýin IRO arqyly jekeshelendirý josparlanǵan. Bul aktıvterdiń saýdasy 2020 jylǵa deıin kezeń boıynsha júzege asyrylady. Birinshi kezeńde Qordyń «Qazaqtelekom», «Eır Astana» jáne «Qazatomónerkásip», ekinshi kezeńde «Samuryq-Energo» jáne «Qazmunaıgaz», úshinshi tolqyn aıasynda «Qazposhta» jáne «Qazaqstan temir joly» kompanııalaryndaǵy úlesi satylady. Jospar boıynsha eki aktıv strategııalyq ınvestorǵa satylady: «Taý-Ken Samuryq» jáne Qazaq Air.
«TMD elderiniń arasynda Qazaqstan kólemi boıynsha Qytaıdyń ekinshi saýda seriktesi bolyp tabylady jáne ınvestısııalar úshin basymdyqqa ıe. 2017 jyly Qytaı men Qazaqstan arasyndaǵy ekijaqty saýda-sattyq 18 mlrd AQSh dollaryna jetti. Qazaqstan úshin «Bir beldeý, bir jol» bastamasyna qatysý jáne «Nurly Jol» jańa ekonomıkalyq saıasatyn júzege asyrý eki eldiń yntymaqtastyǵynda mańyzǵa ıe ınvestısııalarǵa jáne ınfraqurylymdy salýǵa jańa múmkindikter ashady», - dep atap ótti Shanhaı qor bırjasynyń prezıdenti Hýan Hýnıýan.
«Samuryq-Qazyna» basshylyǵynyń pikirinshe, jekeshelendirý – Qordyń damý strategııasyn júzege asyrýda basty rólge ıe. Bul kompanııalar tobynyń básekege qabilettiligin jáne tıimdiligin arttyrýǵa, korporatıvtik basqarý sapasyn jaqsartýǵa múmkindik beredi. Strategııalyq ınvestorlarmen ornatylǵan áriptestik arqyly kásiporyndar úshin jańa tehnologııalar qoljetimdi bolmaq. Búginde Qordyń keıbir qorjyndyq kompanııalarynda jeke aksıonerler bar. Máselen, Qazaqstandaǵy telekommýnıkasııalyq naryqtyń kóshbasshysy «Qazaqtelekom» AQ nemese «Eır Astana» AQ. «Tulpar-Talgo» ıspanııalyq Talgo kompanııasymen birlese jolaýshylar vagondary óndirisin oń jolǵa qoıdy. «Lokomotıv qurastyrý zaýyty» fransııalyq Alstom kompanııasynyń tehnologııalaryn paıdalanyp, elektrovozdardy shyǵarady. Qor ınvestısııa esebinen alynǵan qarjyny jańa jobalar men salalardy damytýǵa baǵyttaýdy josparlap otyr.