О́ńirlik jobalyq keńse jetekshisi Záýresh Muqashevanyń sózinshe, «Rýhanı jańǵyrý» aıasynda jasalǵan is-sharalar sany jóninen oblys elimiz boıynsha 3-shi orynda. Mysaly, «Atameken» kishi baǵdarlamasy boıynsha 14 joba, 13 shara ótkizý belgilense, «Tárbıe jáne bilim» kishi baǵdarlamasy negizinde 29 jobany, 140 sharany uıymdastyrý kózdelgen. Keıbir jobalar 2018-2022 jyldarǵa arnalǵan.
Al oblystyq ishki saıasat basqarmasynyń basshysy Ernur Dáýenovtiń aıtýynsha, «Rýhanı jańǵyrý» sharasy barysynda óńir turǵyndary 800-deı is-sharaǵa qatysypty. Qazir «Ertis óńiriniń kıeli jerleri balalardyń kózderimen» jobasy jasalýda.
Oblysta qasıetti oryndar kartasyn ázirleýde 78 oryn anyqtaldy, onyń 5-eýi respýblıkalyq kartaǵa engizildi. Tarıhshy Qaırat Battalovtyń jetekshiligimen qurylǵan top músheleri áli de jumystaryn jalǵastyrýda. Oblys ortalyǵyndaǵy memlekettik pedagogıkalyq ýnıversıtet Álkeı Marǵulan atyndaǵy arheologııalyq ǵylymı-zertteý ortalyǵyn ashty. Sultanbek sultannyń úı-jaıynyń kóshirme ǵımaratyn saldy. Jáne «Ulaǵat» serııasy boıynsha Ybyraı Altynsarınnen bastap, óńirdiń pedagog, jazýshy qaıratkerleri týraly eńbekter basyp shyǵardy. Qazir Baıanaýyldaǵy kıeli oryndar kartasyn jasaý bastaldy. Jelezın aýdanynda arheologtar toby «Altyn tóbe» qorymdar alabyn zerttemek. Ekibastuz jerindegi qola dáýiriniń jádigeri esepteletin Kemertuz, Aqbıdaıyq jáne О́leńti tastaryndaǵy jazýlardyń kóshirmesin mýzeılerge ornalastyrady. Áýlıekól kesheni mańynda qazba jumystary júrgizilip, Qımaq qaǵanaty bolǵan Kenjekól aýmaǵyndaǵy arhıtektýralyq eskertkishterdi tanystyrady. О́ńirdiń 100 tarıhı tulǵasy týraly serııaly fılmder shyǵarý qolǵa alynýda. Qaırat Battalovtyń málimdeýinshe, qazirgi kezde mamandar sakraldy oryndar geografııasy týraly Android jáne iOS operasııalyq júıelerine sáıkes uıaly telefondarǵa ornatylatyn qosymshalar ázirleýde.
Farıda BYQAI, «Egemen Qazaqstan»
Pavlodar