Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda 2018 jyldyń I toqsanyndaǵy áleýmettik-ekonomıkalyq damý jáne respýblıkalyq bıýdjettiń oryndalý qorytyndylary qaraldy.
Ulttyq ekonomıka mınıstri Tımýr Súleımenov birinshi toqsanda el ekonomıkasynda oń úrdister saqtalǵanyn málimdedi. Esepti kezeńde JIО́ ósimi 4,1% qurady, 2017 jyldyń osyndaı kezeńinde 3,6% bolǵan.
«Mundaı serpin ónerkásiptiń, aýyl sharýashylyǵynyń jáne kórsetiletin qyzmetter salasynyń ósýimen qamtamasyz etildi. Sondaı-aq, JIО́ ulǵaıýyna ınvestısııalardyń joǵary ósýi men tómen ınflıasııalyq prosester septigin tıgizýde», — dedi Tımýr Súleımenov.
QR Ulttyq ekonomıka mınıstrliginiń málimetine sáıkes, ónerkásiptegi ósim 5,3% qurady (2017 jylǵy I toqsanda — 5,8%). Bul rette óńdeý ónerkásibi ozyq qarqyn kórsetip otyr. Ken óndirý ónerkásibinde óndiris 5,1% ósken. Bul salada tabıǵı gaz óndirisi 6,2%, munaı — 6,1% jáne temir keni — 3,7% qurady.
О́ńdeý ónerkásibi 6,2% ósimdi kórsetti. Qaǵaz ónimderin óndirýde (14,9%), hımııa ónerkásibinde (14,3%), farmasevtıkada (10,2%) eki mándik ósim baıqalyp otyr. Basqa da óńdeý ónerkásipteri jyldam ósýde. Mashına jasaý — 9%, jıhaz óndirisi — 8,5%, sýsyn óndirisi — 8,1% jáne azyq-túlik ónimderiniń óndirisi — 6,5%, sondaı-aq metallýrgııa — 5,6% quraıdy.
Aýyl sharýashylyǵynda dınamıka jaqsardy. О́sim 3,6% qurady. О́sý mal sharýashylyǵy ónimderiniń 3,8% keńeıýimen negizdeledi.
I toqsanda qurylys jumystarynyń kólemi eki aılyq tómendeýden keıin ósý traektorııasyna shyqty. Qurylystaǵy ósý 5,9% qurady.
Negizgi kapıtalǵa salynǵan ınvestısııalar 39,5% ulǵaıdy. Investısııalyq salymdar kólik salasyna (58,5%-ke), qurylysqa (57,2%-ke), ónerkásipke (51,6%-ke) jáne saýdaǵa (47,3%-ke) artty.
«Eńbek naryǵyndaǵy jaǵdaı ornyqty bolyp qalýda. Naýryz aıynda jumyssyzdyq deńgeıi 4,9% saqtaldy. Eńbekaqynyń ósýi baıqalyp otyr. Qańtar–naýryzda ortasha aılyq eńbekaqy naqty kóriniste 2,4% ósip, 153,2 myń teńgege deıin jetti», — dep túıindedi Tımýr Súleımenov.