Halyqaralyq «Abaı» klýbynan jaqynda jan jadyratar jaqsy jańalyq habar kelip tústi. Belgili qazaq jazýshysy Rollan Seısenbaev asa kórnekti shyǵarmashylyq qyzmeti úshin Antýan de Sent-Ekzıýperı atyndaǵy halyqaralyq syılyqtyń laýreaty atandy. Mundaı sheshimdi Germanııa men Fransııanyń ádebıet, óner men mádenıet qaıratkerleriniń «Glorııa-Lıon» assosıasııasy biraýyzdan qabyldaǵan.
Osyǵan jalǵasqan ekinshi jaǵymdy jańalyq ta kóp kúttirmedi. Amerıka Qurama Shtattarynyń San-Fransısko qalasynda ornalasqan Halyqaralyq Art-Ortalyǵy 2018 jylǵy Djek London atyndaǵy halyqaralyq ádebı syılyǵynyń laýreattaryn jarııa etti. Naq osy San-Fransısko qalasynda 1876 jyldyń 12 qańtarynda búkil álem Amerıkanyń áıgili jazýshysy hám qoǵam qaıratkeri Djek London retinde biletin Djon Grıffıt Cheını dúnıege kelgen bolatyn.
Osynaý mártebeli syılyqpen marapattalǵan ár eldiń máshhúr jazýshylarynyń arasynda kórnekti qazaq jazýshysy Rollan Seısenbaev ta bar. Onyń «Qum kezgen ólikter» roman-eposy HHI ǵasyrdyń tańdaýly romandarynyń biri dep tanyldy.
Qazaq rýhanııatynyń qabyrǵaly ókilderi qataryndaǵy qarymdy qalamger «О́zimdi izdep júrmin» atty alǵashqy prozalyq jınaǵymen-aq oqyrman júregin jaýlap, ádebıetimizge olja salar oıly jazýshynyń kelgenin ańǵartqan edi. Keıin Ol «Shaıtannyń taǵy», «Qum kezgen ólikter», «Dúnıe tas-talqan bolǵan kún» sııaqty súbeli romandar jazyp, jańa shyǵarmashylyq belesterge kóterildi. Álemdik deńgeıdegi klassıgimiz Ábish Kekilbaev bastaǵan áriptesteri bul eleýli eńbekterine joǵary baǵa berdi. Máskeýdiń bedeldi baspalarynan birneshe kitaby orys tilinde jaryq kórdi. Kóptegen pesalary elimiz teatrlarynyń sahnasynda qoıyldy. Uly Abaıdyń óleńderin, qara sózderin dúnıe júzine tanytýǵa aıanbaı atsalysty. «Amanat» jýrnaly arqyly álem ádebıetiniń injý-marjandaryn qazaqshaǵa aýdaryp, kópshilik ıgiligine jaratty. Endeshe ardaqty aǵamyzdyń aldaǵy ýaqyttarda da tabysty eńbek ete berýine tilektestigimizdi bildiremiz.
Qorǵanbek AMANJOL, «Egemen Qazaqstan»