Almatyda Parlament Májilisiniń depýtaty Bekbolat Tileýhannyń tóraǵalyq etýimen «Nur Otan» partııasy janyndaǵy «Mıras» respýblıkalyq keńesiniń kóshpeli otyrysynda «Jastardyń joǵary bilimge qol jetimdiligi men sapasyn arttyrý» taqyryby talqyǵa salyndy.
Keńes músheleri Bekbolat Tileýhan, Dınar Nóketaeva, Islam Baıramýkov Almatydaǵy Ál-Farabı atyndaǵy Qazaq ulttyq ýnıversıtetiniń, Q.Sátpaev atyndaǵy Qazaq ulttyq tehnıkalyq zertteý ýnıversıtetiniń, Abaı atyndaǵy Qazaq ulttyq pedagogıkalyq ýnıversıtetiniń, Qazaq memlekettik qyzdar pedagogıkalyq ýnıversıtetiniń professorlyq oqytýshylar quramy men stýdenttermen kezdesip, jataqhanalardyń jáne onda turyp jatqan stýdentterdiń jaǵdaıymen tanysty.
Jastarǵa degen memleket qamqorlyǵyn Elbasy óziniń 5 áleýmettik bastamasynda «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý qolǵa alynýy tıis» dep atap kórsetti. Prezıdent N.Nazarbaev Tórtinshi ónerkásiptik revolıýsııa jaǵdaıyndaǵy jańa ekonomıkada zor suranysqa ıe bolatyn san myń jańa mamandy daıarlaýǵa 2022 jyldyń sońyna deıin stýdentterge arnap keminde 75 myń oryndyq jańa jataqhana salýdy tapsyrǵan bolatyn.
«Stýdentter úıin» aralaý kezinde belgili bolǵan jaıttardy atap ótsek, 2017-2018 oqý jylynda Qazaq Memlekettik qyzdar pedagogıkalyq ýnıversıtetinde 5871 stýdent bilim alady. Bul ýnıversıtette 7 jataqhana bar, onda 3177 stýdent turady. Al Ál-Farabı atyndaǵy QazUÝ-de 17 143 stýdent bilim alsa, onyń ishinde grantta oqıtyndar sany – 13 775. Ýnıversıtetke qarasty 16 jataqhanada 5730 stýdent turyp jatyr. Q.Sátpaev atyndaǵy Qazaq ulttyq tehnıkalyq ýnıversıtetinde 9949 stýdent oqıdy. Oǵan tıesili 6 jataqhanada 1998 stýdent turyp jatyr. Abaı atyndaǵy ulttyq pedagogıkalyq ýnıversıtetinde 6821 stýdent bilip alsa, onyń 1887-si osyndaǵy 5 jataqhanaǵa qonystanǵan. QazUÝ-diń rektory, akademık Ǵ.Mutanovtyń aıtýynsha, josparda turǵan jalpy aýmaǵy 45 myń ga jerge 1287 orynǵa eseptelgen, ıaǵnı 543 bólmelik 12 qabatty zamanaýı talapqa saı jańa jataqhana qurylysyn júrgizý jumysy taıaý arada qolǵa alynady.
Elimizdiń joǵary oqý oryndarynda bilim alyp jatqan 530 myń stýdenttiń 204 myńy qalaǵa syrttan kelgen stýdentter. Stýdentterdiń jataqhanamen qamtylýyn kórsetetin resmı statıstıkalyq málimetter taldaýy bul jaǵdaıdyń qanaǵattarlyq deńgeıde emes ekenin kórsetti. Jalpy alǵanda respýblıka boıynsha stýdenttik jataqhanalarǵa suranys 77500 kereýettik oryn bolyp otyr. Sonyń ishinde eń kóbi Almaty qalasyna tıesili – 21557 adam jataqhanaǵa muqtaj.
Keńestiń kóshpeli jıyn qortyndysynda «Mıras» keńesi memleket basshysy N.Nazarbaevtyń «Prezıdenttiń bes áleýmettik bastamasy» Úndeýine qoldaý bildirdi. «Bes áleýmettik bastama» aıasyndaǵy árbir baǵyt mańyzdy ári qoǵamnyń belgili bir toptarynyń suranysyna saı asa qajet úlken múmkindikter alańy bolmaq.
Aıgúl AHANBAIQYZY,
«Egemen Qazaqstan»
ALMATY