Eńbekshiqazaq aýdany Qaınazar aýylynda turatyn Jańabaevtar otbasy kún energııasyn qoldaný arqyly óz úılerin tolyqtaı elektr qýatymen jáne ystyq sýmen qamtamasyz etip otyr. Sonymen qatar artyq óndirilgen elektr energııasyn ortaq jelige ótkizip, qosymsha tabys taýyp jatyr, dep jazady Egemen.kz.
Tipti eldi mekende elektr qýaty ýaqytsha óshirilgen jaǵdaıda da «Jasyl» tehnologııalardyń arqasynda olardyń úıi jaryqpen jáne ystyq sýmen úzdiksiz qamtylady.
Bul jobany kásipker Temirhan Jańabaev eki jyl buryn qolǵa alǵan. Alǵashqy kezeńde úı shatyryna 24 kún paneli ornatylyp, sonyń nátıjesinde ortalyq jeliden tutynylatyn elektr energııasy 90 paıyzǵa deıin azaıtylǵan. Kásipkerdiń aıtýynsha, kún panelderiniń qyzmet etý merzimi 25 jylǵa deıin jetedi. Bastapqy ınvestısııany qajet etkenimen, panelder berik shyńdalǵan áınekten jasalǵan jáne aýa raıynyń qolaısyz jaǵdaılaryna tózimdi.
Shyǵysta jylý júıesine kún energııasy tehnologııalary engizilip jatyr
Qazirgi ýaqytta sharýashylyqta qýaty 670 vatt bolatyn 42 kún paneli jumys isteıdi. Jalpy óndiriletin qýat kólemi saǵatyna shamamen 30 kılovatty quraıdy. Budan bólek, úıde tek kún energııasymen jumys isteıtin, syıymdylyǵy 250 lıtrlik sý jylytqysh ornatylǵan. Arnaıy jylý saqtaý júıesiniń arqasynda kúndiz qyzdyrylǵan sý táýlik boıy óz jylýyn saqtaıdy.
Taýly aımaqtyń eteginde ornalasýy da energııa óndirý tıimdiligine oń áserin tıgizip otyr. Temirhan Jańabaevtyń aıtýynsha, kún panelderi otbasy úshin qosymsha tabys kózine aınalǵan. Kún saıyn shamamen 25 kılovatt artyq elektr energııasy «Alataý Jaryq Kompanııasyna» satylyp, salynǵan 5 mıllıon teńge ınvestısııanyń jartysyna jýyǵy qaıtarylǵan.
Jaz aılarynda kún sáýlesiniń moldyǵyna baılanysty aı saıynǵy tabys 200 myń teńgege deıin jetse, qys mezgilinde bul kórsetkish 50-60 myń teńge shamasynda bolady.
Aldaǵy josparda kásipker buryn alma baǵy bolǵan 1,5 gektar jer telimine qosymsha kún panelderin ornatýdy kózdep otyr. Qoldanystaǵy zańnama táýligine 200 kılovattqa deıin elektr energııasyn satýǵa múmkindik beredi, bul jobany keńeıtýge jol ashady.
Kún energııasymen júretin ıahta
Mundaı bastamalar Eńbekshiqazaq aýdanynda «jasyl» energetıkany damytýǵa jáne aýyldyq jerlerdegi energııa tıimdiligin arttyrýǵa aıtarlyqtaı úles qosady.