Halyqaralyq Túrki akademııasynyń uıytqy bolýymen ótken kúı keshi Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda saltanat qurdy.
Tarıhty kúımen tápsirlep, tanymdy jyrmen tasqyndatqan tulǵanyń biri – dáýlesker kúıshi Ábdimomyn Jeldibaev. Qazaqstannyń eńbek sińirgen qaıratkeri, «Parasat», «Qurmet» ordenderiniń ıegeri, kúıshi-kompozıtor Ábdimomyn Jeldibaevtyń bir ǵana «Erke sylqym» kúıi qazaqtyń tutas dáýir kelbeti deýge bolady.
1970 jyly dúnıege kelgen ol óner týyndysy qazaqty jarty ǵasyrǵa jýyq tylsym da tereń áýezimen áldılep keledi. Jalyndaǵan oı men syrly sezimniń jaýhar jemisi «Erke sylqym» týraly halyq jazýshysy Sherhan Murtaza «Ábdimomynnyń «Erke sylqymy» – qazaq óneriniń altyn qorynda máńgi saqtalatyn qanatty týyndy» dep joǵary baǵa bergen eken. Shynymen de «Erke sylqym» – eldiń qazynasyna aınalǵan erekshe mýzyka, eren qubylys. Oǵan biz ótken jumada elordamyzdaǵy Qazaq ulttyq óner ýnıversıtetinde ótken «Erke sylqym» atty erekshe keshte taǵy bir márte kýá boldyq.
Onyń otyzǵa tarta kúıi men jıyrmaǵa jete ániniń ishinde – elin súıgen, eli súıgen Elbasyna arnaǵan «Nursultan» atty kúı-dastanymen shoqtyǵy bıik. Alashtyń egemendigin kúımen jyrlap, Elbasynyń eren erligin sazben sýrettegen dáýlesker kúıshiniń bir artyqshylyǵy da osy bolsa kerek.
Kesh shymyldyǵy avtordyń «Jetisý sazymen» bastalyp, «Tóle bı» tolǵaýy arqyly «Nursultan» poemasymen jalǵasýynan biz tarıhı oqıǵalar jelisiniń jiti saqtalǵanyn ańǵarǵandaı edik. «Shabyt» ýnıversıtetiniń «Jambyl» zalyndaǵy ónersúıer qaýym da osy oılardyń jeteginde Jetisý jazırasyn aralap ketkendeı ańsar kúı keship otyrdy. Siltideı tynyp, sahnaǵa kóz jibergen kórermen kóńil kókjıegin kúı-kerýenine solaı uzatyp jibergendeı. Uran kúılerden Uly Daladaǵy tarıh kóz aldyńa kelip, ótkeni ózegińde týlap jatqandaı.
Astana qalasy memlekettik fılarmonııasynyń qazaq orkestri de Jeldibaev álemine dendeı enip ketken. Osy jerde kórkemdik jetekshi hám bas dırıjer Qazaqstannyń eńbek sińirgen qaıratkeri Aıtqalı Jaıymov ekenin aıta ketken jón. Keshtiń kórkemdik jetekshisi Álqýat Qazaqbaı da sol kúı keńistigin kórermen kóńilimen kemeldendirip jibergen. Al kúı keshiniń alǵashqy aıshyqty sózi memleket jáne qoǵam qaıratkeri Myrzataı Joldasbekovtiń kúı ónerine qatysty ulaǵatty oıymen órnektelse, Qazaqstan Respýblıkasy Prezıdenti Keńsesiniń bastyǵy Mahmut Qasymbekov bastaǵan zııaly qaýym ókilderi de jyly lebizderin bildirdi. Ol qatarda Mádenıet jáne sport mınıstri Arystanbek Muhamedıuly, Qazaqstannyń Eńbek Eri, Qazaq ulttyq óner ýnıversıtetiniń rektory Aıman Musaqojaeva da bar.
«Búgingi keshke siz Elbasy Nursultan Nazarbaevty da shaqyrdyńyz. Prezıdentimiz rasymen de sizdiń shyǵarmashylyǵyńyzǵa yntasy aýyp, qarap júredi. Sol sebepti de ózińizdiń keshińizge shynaıy lebizin bildirip, quttyqtaý hatyn joldady», dedi M.Qasymbekov. Hatta «Men – sizdiń shyǵarmashylyǵyńyzdy óte joǵary baǵalaıtyn adamdardyń birimin. Ásirese syrly da shýaqty, názik te ásem «Erke sylqym» kúıińizdi halqymyzdyń mýzykalyq qazynasynda ózindik orny bar týyndy dep esepteımin. Osy keshte maǵan arnalǵan kúı-poemańyzdy oryndamaq ekensiz. Úlken yqylas-qurmetińiz úshin kóp rahmet. Keshińiz mazmundy ótip, kópshiliktiń oıynan shyǵýyna shyn kóńilden tilektespin» delingen.
Keshtiń taǵy bir este qalarlyq eleýli sáti – Á.Jeldibaevqa «Qazaq ulttyq óner ýnıversıtetiniń Qurmetti professory» ataǵy berilgen mezet bolatyn. Ol syıly marapatty mınıstr Arystanbek Muhamedıuly men áıgili skrıpkashy Aıman Musaqojaeva tabystady.
Keshtiń qorytyndy sátin hor qyzyndaı kúıshi, Qazaqstannyń eńbek sińirgen ártisi, professor Aıgúl Úlkenbaeva talanty túıindedi. Jambyl oblystyq fılarmonııasynyń dombyrashylarymen birge Astana qalasy memlekettik fılarmonııasynyń qazaq orkestri qosylyp, Aıgúl Úlkenbaeva tartqan «Erke sylqym» shynymen de shyrqaý bıikke shyǵyp, kúıshi juldyzyn kókte jarqyratty.
Kesh sońynda Á.Jeldibaev sharanyń saltanatty ótýine atsalysqan azamattarǵa alǵys bildirdi.
Mıras ASAN,
Sýretti túsirgen Orynbaı BALMURAT,
«Egemen Qazaqstan»