«Astana medısına ýnıversıteti» AQ-ǵa túsý úshin IELTS sertıfıkatyn satyp alǵan 100-den astam stýdent oqýdan shyǵaryldy, dep habarlaıdy 24.kz.
Esterińizge salaıyq, byltyr kúzde emtıhandy óz kúshimen tapsyrǵandar aryzdanyp, bul is boıynsha tekseris júrgizilgen edi. Sonyń nátıjesinde aǵylshyn tili emtıhany boıynsha 117 tirkelmegen sertıfıkat anyqtaldy. IELTS sertıfıkaty magıstratýra nemese doktorantýraǵa túsý kezinde basymdyq beredi. Sol sebepti byltyr kóp adam bul qujatty satyp alǵan. Alaıda barlyq synaqtan óz kúshimen ótkender emtıhan nátıjesimen kelispeı, bul máselege qoǵam nazaryn aýdarýǵa tyrysty. Nátıjesinde QR Bilim jáne ǵylym mınıstrligi tekseris júrgizip, bazada tirkelmegen 117 sertıfıkat bar ekendigin anyqtady. «Bilim jáne ǵylym mınıstrliginiń komıssııasy eki ret tekseris júrgizdi. Basynda biz 33 balany shyǵardyq. Jaqynda taǵy 84 stýdent oqýdan shettetildi. Endi bul azamattar olardyń oqýyna jumsalǵan qarjyny qaıtarýy tıis. Olardyń kóbi grantta oqydy. Tek 9 adam ǵana aqyly túrde bilim aldy», - deıdi «Astana medısına ýnıversıteti» AQ rektorynyń orynbasary Frans Galıskıı.
Bul oqıǵany tergeý qalalyq Ishki ister departamentine júkteldi. Nátıjesinde 117 qylmystyq is qozǵaldy. Onyń 30-y sotqa jiberildi. «385-baptyń 3-bóligi, ıaǵnı jalǵan qujatty paıdalaný isi boıynsha 300 aılyq eseptik kórsetkish kóleminde aıyppul taǵaıyndalady. Sonymen qatar qamaýǵa alý nemese qoǵamdyq jumystarǵa tartý da qarastyrylǵan», - deıdi Saryarqa aýdandyq №2 sotynyń sýdıasy Bolat Pazylov.
Qazir oqýdan shyǵyp qalǵan stýdentterdiń orny bos. Endi emtıhandy óz kúshimen tapsyrǵandar osy granttardy ıelenýden úmitti. «О́kinishke qaraı, biz bul máseleni óz betimizben sheshe almaımyz. Ol úshin Bilim jáne ǵylym mınıstrligi birqatar qujatty retteý kerek. Sonyń negizinde aqsha tólep oqyp jatqandardy osy bos oryndarǵa aýystyramyz», - deıdi «Astana medısına ýnıversıteti» AQ rektorynyń orynbasary.
Jalǵan sertıfıkat satyp alǵan stýdentterdiń bári oqýdan kúzde shyǵarylýy tıis edi. Biraq sottyń bul sheshimi ýaqtyly oryndalmaǵan. Mundaı jaǵdaıda medısına mamandaryn daıarlaıtyn oqý ordasy lısenzııasynan aıyrylýy da múmkin.