Búgin «Adamı resýrstardy basqarý: bolashaq uıymy» taqyrybyn arqaý etken XIII Halyqaralyq HR-konferensııasy óz jumysyn bastady. Sharanyń resmı bóliminde «Samuryq-Qazyna» AQ Basqarma Tóraǵasy Ahmetjan Esimov holdıngtiń jańa kadrlyq saıasatyn tanystyrdy, dep habarlaıdy kompanııanyń baspasóz qyzmeti.
«Birinshiden, biz basqarýshy deńgeıdegi qyzmetkerlerdiń sanyn qysqartyp, shaǵyn ári tıimdi basqarý qurylymyn bekittik. Bul shuǵyl túrde sheshim qabyldaýǵa múmkindik beredi, ıaǵnı kelisim berý prosedýralaryna jumsalatyn ýaqytty edáýir azaıtady. Ekinshiden, barlyq qorjyn kompanııalarda jumysqa qabyldaý kezinde, kondıdattardy irikteýdiń ashyqtyǵyn qamtamasyz etetin konkýrstyq irikteýdiń biryńǵaı júıesi engiziletin bolady», - dedi «Samuryq-Qazyna» AQ Basqarma Tóraǵasy Ahmetjan Esimov.
Sondaı-aq, A.Esimov basqarýshy laýazymyna taǵaıyndaýdyń sabaqtastyq qaǵıdattary qabyldanatynyn aıtty. Nátıjesinde, kompanııa qyzmetkerleri arasynan bilikti kadrlyq rezervi qalyptasady. Basqarma Tóraǵasy sheteldik mamandardy jumyldyrý máselesine de toqtaldy. «Samuryq-Qazyna» shetelden kelgen azamattardyń qyzmetinen tolyqtaı bas tartpaıdy, degenmen olardyń ornyn basatyn mamandardy daıyndaý - basty nazarda: basymdylyq jergilikti azamattarǵa beriledi.
Ulttyq ál-aýqat qorynyń Basqarma Tóraǵasy satyp alý salasyna úlken mán beriletinin aıtty. Máselen, dál osy baǵytta bos oryn qarastyrýshylardy polıgraf kómegimen testileýden ótkizý múmkindigi qarastyrylýda.
Ahmetjan Esimov «Samuryq-Qazyna» korporatıvtik ýnıversıtetine 1 jáne 2 deńgeıdegi basshylar úshin kóshbasshylyqtyń mindetti baǵdarlamasyn ázirleýdi jáne endirýdi, kompanııa qyzmetkerlerine sıfrlyq daǵdylardy meńgertýdi jáne kúndelikti HR-operasııalardy Jalpy qyzmet kórsetý ortalyǵy arqyly oryndap, sıfrlyq formatqa kóshirýdi tapsyrdy.
Atalǵan konferensııa barysynda ulttyq, kvazımemlekettik kompanııalardyń jáne basqa mekemelerdiń basshylary sóz sóıledi: QR Prezıdenti Ákimshiligi Memlekettik qyzmet jáne kadr saıasaty bóliminiń meńgerýshisi Marat Dáýeshov, «Qazaqstan» RTRK AQ Basqarma tóraǵasy Erlan Qarın, QazUО́Ý rektory, Qazaqstannyń halyq ártisi Aıman Musahodjaeva.
Sonymen birge, is-shara baǵdarlamasynda álemge áıgili ǵalym jáne zertteýshi Robert Kýınn (AQSh) (korporatıvti mádenıetke dıagnostıka júrgizý ádistemesiniń avtory); premer-lıga (FIFA) sportshylarynyń tulǵalyq damýy boıynsha keńesshisi jáne koýchy Endı Barton (Ulybrıtanııa); Microsoft qyzmetkerlerin daıarlaý qyzmetiniń jetekshisi Ksenııa Pletner (Reseı) sekildi dúnıejúzine belgili sheteldik spıkerlerdiń baıandamalary josparlanǵan. Sonymen birge HR-qaýymdastyǵynyń keńeıtilgen otyrysy ótedi.