Ekinshi dúnıejúzilik soǵysqa Ońtústik Qazaqstan óńirinen 140 myńnan astam adam attanyp, olardyń jartysyna jýyǵy týǵan jerge oralmaǵan.
Soǵysta janqııarlyq erligi úshin 51 ońtústikqazaqstandyq Keńes Odaǵynyń batyry, 8 maıdanger «Dańq» ordeniniń ıegeri atandy. Myńdaǵan ardagerler túrli orden, medaldarmen marapattaldy. Búgingi tańda Ońtústikte 174 Uly Otan soǵysynyń ardageri, 4885 maıdanǵa qatysýshy men múgedekke teńestirilgender jáne 15733 tyl eńbekkeri bar.
Jeńistiń 73 jyldyǵyna oraı Shymkent qalasyndaǵy «Ońtústik» qabyldaý úıinde maıdangerlerge qurmet kórsetildi, merekelik dastarhan jaıylyp, konserttik baǵdarlama usynyldy. «Halqymyzda «Er – eliniń qorǵany» degen ataly sóz bar. Biz osyndaı jandardyń erlikterine saı syı-qurmet kórsete otyryp, olardan ónege alyp ósetin jas urpaq Otanyna adal qyzmet etedi dep senemiz. Sizderdiń jáne erligimen esimderi tarıhymyzda jazylǵan batyr babalardyń aldynda ólsheýsiz qaryzdarmyz. Elbasymyz maıdannan oralmaǵan jaýyngerlerimizdiń esimderin máńgi el esinde saqtaýda jáne aramyzda júrgen ardagerlerimiz ben tyl eńbekkerlerin ardaqtaýda árqashan memlekettiń qamqorlyǵy bolatynyn aıtyp, jarqyn bastamalarǵa jol ashyp keledi. Sondyqtan da aqtańdaq jyldardaǵy el azamattarynyń jaýjúrektiligi men tyl eńbekkerleriniń eren eńbekterine biz árdaıym qurmetpen bas ıemiz»,- dedi merekelik jıynǵa qatysqan Ońtústik Qazaqstan oblysynyń ákimi Janseıit Túımebaev. Merekelik kezdesý barysynda oblystyq jáne qalalyq ardagerler keńesiniń tóraǵalary men maıdan jáne tyl ardagerleri sóz sóılep, qazirgi kezde memleket tarapynan kórsetilip jatqan qurmet, qoldaýlarǵa rızashylyqtaryn bildirdi.
Sondaı-aq, oblys ákimi soǵys ardageri Murataly Tólepbergenulyn Uly Jeńis kúnimen arnaıy quttyqtap baryp, syı-sııapat jasady. Búginde toqsannan asyp otyrǵan ardager kezinde Belarýs maıdanynda bolyp, Oder ózeninen ótý, Ýkraına, Belorýs jerlerin azat etýde erlik kórsetken. Brest qamaly, Varshava, Dansk, Vıssmark, Bıttenbýrg, Perleberg qalalarynyń shaıqasyna qatysqan. Soǵysta kórsetken erlikteri úshin: II–shi dárejeli «Uly Otan soǵysy» ordenimen, «Erligi úshin», «Varshavany azat etkeni úshin», «Germanııany jengeni úshin» jáne merekelik medaldarmen marapattalǵan.
Germanııanyń Bıttenberg qalasynda jaýyngerlik joly jeńispen aıaqtalǵan maıdanger elge 1950 jyly oralǵan. Soǵys ardageri 2 ul 6 qyz ósirip, 19 nemere, 10 shóbere súıip otyr. Maıdanger ózin quttyqtaı kelgen aımaq basshysyna alǵysyn bildirip, aq batasyn berdi.
Erkin DOSYMBAI,
Ońtústik Qazaqstan oblysy