«Nursultan Nazarbaevtyń Bilim Qory» qoǵamdyq qorynyń aıasynda 2011 jyly qurylǵan «Arystan» mamandandyrylǵan lıseıinde elimizdiń barlyq óńirlerinen kelgen 9-11-synypta oqıtyn 240 jasóspirim tegin bilim alýda.
Lıseı búginde zamanaýı oqý-materıaldyq bazasymen jabdyqtalǵan. Munda muǵalimderge arnalǵan turǵyn úıler, sporttyq jattyǵý keshenderi, mýltımedıa ortalyǵy men jıyrma myńnan astam kitaptan turatyn kitaphana qory bar.
Prezıdent N.Á.Nazarbaev 2013 jyly sáýir aıynda kelgen saparynda «Arystan» lıseıine joǵary baǵa berip, bilim alýshylar elimizdiń Qorǵanys kúshteriniń qurylymdarynda abyroımen qyzmet etetinderine zor senim bildirgen bolatyn.
«Arystan» lıseıindegi saltanatty kúnderdiń biri – Lıseı kúni. 2011 jylǵy 24 sáýir «Nursultan Nazarbaevtyń Bilim Qory» qoǵamdyq qorynyń dırektory D.N.Qulybaeva atalǵan oqý ornynyń bastyǵy, zapastaǵy general-maıor S.S.Taýlanovqa lıseı Týyn tabystaǵan kún. Mine, osy sátten bastap lıseı oqýshylary bul kúndi saltanatty jaǵdaıda atap keledi.
Bıyl «Arystan» lıseıiniń qurylǵanyna jeti jyl tolyp otyr. Osy ýaqyt aralyǵynda lıseı bes márte túlekterin úlken ómirge qanat qaqtyrdy. Al jyldaǵy dástúr boıynsha 9-synyp oqýshylarynyń ant qabyldaý saltanatyna «Nursultan Nazarbaevtyń Bilim Qory» qoǵamdyq qorynyń basshylyǵy, Qazaqstan Qarýly Kúshteriniń Bas shtaby bastyǵynyń orynbasary M.K.Talasov, Talǵar aýdanynyń ákimi R.A.Sátbaev, t.b. qatysty.
Elvıra SERIKQYZY, «Egemen Qazaqstan»
ALMATY