Taran aýdanynda «Dınamo» deneshynyqtyrý-sport qoǵamynyń qoldaýymen ótken kókparǵa 150 kókparshy qatysty. Oblystyq ishki ister departamentiniń komandasyndaǵy jigitter epti de myqty kókparshy ekenin kórsetip, birinshi oryndy jeńip aldy.
Komanda kapıtany, departament qyzmetkeri Baqdáýlet Asanovqa aýdaryspaqta qarsylas shaq kelmedi, ol birinshi oryndy aldy.
At sporty oıyndary, ásirese, kókpar sońǵy jyldary Qostanaı óńirinde keń tarap keledi. Polıseı Baqdáýlet Asanovtyń aıtýynsha, oblystyq ishki ister departamentiniń basshylyǵy ulttyq at sporty oıyndaryn damytýǵa erekshe kóńil bóledi. Eki jyldan beri polıseıler komandasy kókpardan úzbeı jattyǵýlar ótkizedi.
«Kókpar men aýdaryspaq oıyndary jigittiń boıynda eptilik pen myqtylyqty qalyptastyrady. Komandadaǵy polıseılerdiń bári at sportymen bala kezden aınalysqan jigitter. Kókpar bizdiń qanymyzǵa sińgen, atalarymyz attyń qulaǵynda oınaǵan ǵoı», deıdi Baqdáýlet.
Al sport, onyń ishinde kókpar qazaq halqynyń, Orta Azııa halyqtarynyń eń súıikti ulttyq oıyny bolyp sanalǵan. Elin, jerin jaýdan qorǵaǵan batyrlarymyzdyń barlyǵy da osy kókpar men aýdaryspaqta shynyqqan. Al eldiń tynyshtyǵyn qorǵaıtyn polıseıler at sporty naǵyz shynyǵý ekenin aıtady.
Názıra JÁRIMBET, «Egemen Qazaqstan»