Atyraýdyń mádenı ómiri Astananyń 20 jyldyǵyna arnalǵan sharalarmen tolyǵýda. Jergilikti óner ujymdarynyń konserttik baǵdarlamalarynan bólek Atyraý oblysyndaǵy «Astana qalasynyń mádenıet kúnderi» aıasynda birqatar sharalar uıymdastyryldy.
Munaıly óńir turǵyndary elordadaǵy memlekettik akademııalyq fılarmonııanyń klassıkalyq jáne estradalyq vokal bólimi, «Saryarqa» halyq mýzyka ansambli, «Shalqyma» halyq bıi ansambli, estradalyq bı ansambliniń ónerlerine tánti boldy. Oblystyq halyq shyǵarmashylyǵy ortalyǵynda ótken «Astanadan aq tilekpen», «Elordadan elge sálem» atty konsertter de atyraýlyqtarǵa aıryqsha kóńil kúı syılady.
Jaıyq jaǵasyn ásem ánmen terbegen ónerpazdarmen qatar qolóner sheberleri de buıymdaryn ala keldi. Sh.Sarıev atyndaǵy kórkemsýret jáne óner mýzeıindegi kórmege otandyq sýretshilerdiń 100-den astam týyndysy qoıyldy.
Astana qalasy memlekettik akademııalyq fılarmonııasynyń bólim jetekshisi Araılym Rahymqyzy: «Atyraýlyq kórermenniń ónerge degen yqylasy shabyt syılady. Qurmet-qoshemetke rıza boldyq. Astana mereıtoıynyń qarsańynda barlyq óńirlerge gastroldik saparmen shyǵýdy josparladyq, endigi baǵytymyz Mańǵystaý oblysy», – deıdi.
Astanadaǵy Jastar teatry da munaıly aımaqqa kelip, repertýarlaryndaǵy mıýzıkl, sahnalyq povest, halyq ertegisi sekildi qoıylymdardy atyraýlyqtardyń nazaryna usyndy. Elorda tórinde shyǵarmashylyqtaryn shyńdap júrgen óner ujymdarynyń qaı-qaısysynyń da deńgeıi joǵary ekenin baǵamdaǵan talǵampaz kórermen oń baǵa berip, qoshemet kórsetti.
Baqytgúl BABASh, «Egemen Qazaqstan»
ATYRAÝ