Ońtústik Qazaqstan oblysynda bıyl mektepti 33766 oqýshy bitirdi, onyń ishinde 26000 qazaq, 2834 orys, 4605 ózbek, 327 oqýshy tájik synyptarynyń oqýshylary.
Túlekterdiń 1692-si «Altyn belgige», 1029-y úzdik attestatqa úmitker. Jalpy bıylǵy oqý jylynda oblystaǵy 1038 mektepte 634 myńǵa jýyq oqýshy bilim aldy. Barlyq mektepterde sońǵy qońyraý saltanaty «El júregi – Astana» taqyrybynda ótti. Túlekterdi quttyqtaý úshin Hımııa bıologııa baǵytyndaǵy N.Nazarbaev zııatkerlik mektebiniń sońǵy qońyraý sharasyna qatysqan oblys ákimi Janseıit Túımebaev memleket júzege asyryp jatqan reformalar men atqaryp jatqan qyrýar ister jastar úshin jasalynýda ekenin atap ótti. «Sizder Elbasy armandaǵan «Máńgilik el» - ıdeıasynyń qurylysshylary ekenderińizdi eshýaqytta esten shyǵarmańyzdar. Elbasy óziniń halyqqa Joldaýynda jastardy bilimdi, eńbekqor, bastamashyl, belsendi bolýǵa jas kezinen bastap daǵdylanýyn basty nazarǵa aldy», - dedi Janseıit Túımebaev. Sonymen qatar, oblys basshysy mektep kitaphanasynyń qoryna «Jahan tanyǵan jeti tulǵa», «Túrkitanýdyń tarıhı-lıngvıstıkalyq negizderi» atty týyndylardy tartý etip, urpaq tárbıesi úshin ter tógip júrgen birqatar ustazdardy marapattady.
Aıta ketelik, bıyl Hımııa –bıologııa baǵytyndaǵy Nazarbaev zııatkerlik mektebin 97 túlek aıaqtady. Olardyń 30-dan astamy sheteldik JOO-na qujat tapsyrypty. Qazirgi tańda mekteptiń 17 túlegi álemdik reıtıngtiń úzdik 100 ýnıversıtetine kiretin Amerıka, Germanııa, Koreıa, Qytaı, Reseı, Kanada elderiniń joǵary oqý oryndarynda tegin oqý grantyna ıe bolǵan.
Erkin DOSYMBAI,
Ońtústik Qazaqstan oblysy.