Memleket basshysynyń tapsyrmasyna sáıkes osy jyly Aqtóbe oblysynda «Baqytty bala» aýqymdy áleýmettik jobasy júzege asyrylýda. Onyń basty maqsaty – balalarǵa, olardyń ıntellektýaldyq, fızıkalyq, rýhanı-adamgershilik jaǵynanan damýyna qolaıly jaǵdaı jasaý.
Jobanyń basty baǵyttarynyń biri balalardyń demalysy men bos ýaqytyn tıimdi paıdalanýyn uıymdastyrý, sonymen qatar olardy saýyqtyrý bolyp tabylady. Osy jyldyń jazynda 118 myń aqtóbelik oqýshy nemese barlyq balanyń 93 %-y lagerlerde demala alady, sonyń ishinde áleýmettik jaǵdaıy tómen otbasylardan shyqqan 16 myń balaǵa jáne 700 qıyn balaǵa joldama beriledi.
Búginde oblys boıynsha qala syrtynda on lager jumys jasaıdy, onda oqýshylardy qabyldaýǵa daıyndyq belsendi túrde júrip jatyr. Buǵan qosa, daryndy balalarǵa arnalǵan «Vostok» jyl boıǵy lageri jumys jasaıdy. «Ásem» balalar lageriniń janynan «Artek» úlgisindegi jyl boıǵy demalys bazasy qurylýda.
Alǵa aýdanynyń Bestamaq aýylynda alty kezeńniń ishinde 600-deı balany qabyldaıtyn Qazaqstandaǵy alǵashqy ınklıýzıvti lager ashylady. Munda erekshe bilim berýdi qajet etetin balalarǵa defektologtar, logopedter, psıhologtar, fızıkalyq terapııa oqytýshylary men basqa da mamandandyrylǵan muǵalimder kómek beredi. Lagerde sondaı-aq, logoped, sensorli kabınetter, massaj ben fızıoterapııa kabınetteri jumys jasap, ınklıýzıvti balalar alańy qurylmaq. Aıta keteıik, Qobda aýdanynyń Egindibulaq aýylynda taǵy bir jyl boıǵy lagerdiń qurylysyna daıyndyq bastaldy.
Bıyl 366 oqýshy Almaty oblysyndaǵy «Bóbek» jáne Aqmola oblysyndaǵy «Baldáýren» respýblıkalyq saýyqtyrý lagerlerine barady. Taǵy 70 bala «Qapshaǵaı-Baldáýren» respýblıkalyq bilim berý-saýyqtyrý lagerinde demalady.
Oqýda erekshe jetistigimen, shyǵarmashylyq jáne sportta úzdik bolǵan oqýshylar oblys aýmaǵynan tys jerlerde demalýǵa attanady. Osylaısha, oblystyń 3350 oqýshysy «Baqytty bala» jobasy aıasynda Almaty, Ońtústik-Qazaqstan, Qyzylorda jáne Jambyl oblystarynyń qasıetti jerlerinde saıahat jasasa, 2600 oqýshy týǵan óńirdiń mádenı jáne tarıhı kórikti jerlerimen tanysý úshin «Yrǵyz-Torǵaı» tabıǵı qoryǵyna barady. Aqtóbe oblysynyń tarıhy týraly kóbirek bilýge jáne demalýǵa elimizdiń ózge aımaqtarynan 70 oqýshy demalýǵa múmkindik alady.
Shyǵys Qazaqstan oblysynyń «Daryn» lagerine 400 bala, taǵy 120 balany Reseı Federasııasy Orynbor oblysynyń «Solnechnaıa strana» lagerine jiberiledi. Bes daryndy bala tatarstandyq «Baıtık» lagerinde robototehnıka salasyn tereńirek úırenýge múmkindik alsa, taǵy bir jas aqtóbelik Malaızııanyń arnaıy lagerinde shet tilinen bilimin tereńdete alady.
Sonymen qatar, Qazaqstan men Qytaı Halyq Respýblıkasynyń arasyndaǵy yntymaqtastyq týraly kelisim boıynsha Aqtóbe oblysynyń oqýshylary úshin Qytaı lagerinde demalýǵa 5 kvota bólingen. Sondaı-aq, О́zbekstannyń Qazaqstandaǵy jyly aıasynda tamyz aıynda Baıqońyr-Túrkistan-Tashkent-Samarqand baǵytymen 100 balaǵa arnalǵan týrıstik sapar uıymdastyrylady.
Temir Qusaıyn,
«Egemen Qazaqstan»
Aqtóbe oblysy