Mınıstrlikter úıiniń májilis zalynda Mádenıet jáne sport mınıstri Arystanbek Muhamedıuly «Jahandyq álemdegi zamanaýı qazaqstandyq mádenıet» baspasóz týrynyń aıasynda sheteldik BAQ ókilderimen kezdesti. Kezdesýge AQSh, Fransııa, Ulybrıtanııa, Ispanııa, Italııa, Egıpet jáne Qytaı elderinen jýrnalıster qatysty.
Mádenıet jáne sport mınıstrligi men Syrtqy ister mınıstrliginiń birlesken jobasynyń maqsaty – dúnıe júziniń iri buqaralyq aqparat quraldary ortalyqtarynan kelgen jýrnalısterge Elbasynyń «Rýhanı jańǵyrý» baǵdarlamalyq maqalasynyń negizgi tarmaǵynyń biri – «Jahandyq álemdegi zamanaýı qazaqstandyq mádenıet» jobasy aıasynda qazaq mádenıeti men ónerin tanystyrý jáne nasıhattaý.
– Elimizdiń tarıhy men mádenıetine, ónerine ózderiniń úlken qyzyǵýshylyǵyn tanytyp, mine álemdegi eń iri aqparat ortalyqtarynyń jýrnalısteri Astanaǵa kelip jatyr. Bul bizge maqtanysh sezimimen qatar, úlken jaýapkershilik te júkteıdi. Sebebi osy sátti paıdalanyp sheteldik jýrnalıster nazaryna barlyq jetistigimiz ben jeńisimizdi óz deńgeıinde kórsetip, túsindirý qajettiligi týyndaıdy. Al táýelsizdik alǵan kezden bastap iske asyp jatqan ondaı jetistikter bizdiń elimizde jeterlik. Sonyń biri – Elbasy Nursultan Nazarbaevtyń «Rýhanı jańǵyrý» baǵdarlamasy. Atalǵan baǵdarlama aıasynda ómirge kelgen «Jahandyq álemdegi zamanaýı qazaqstandyq mádenıet» jobasy negizinde júrgizilip jatqan is-sharalar álemniń túkpir-túkpirinen jınalǵan BAQ ókilderiniń nazaryna usynylatyn, tanystyrylatyn bolady, – dedi Arystanbek Muhamedıuly.
Is-shara barysynda sheteldik BAQ ókilderi úshin Mádenıet jáne sport mınıstri Arystanbek Muhamedıuly «Rýhanı jańǵyrý» baǵdarlamasyn shetelde ilgeriletý maqsatynda osy baǵytta atqarylyp jatqan jumystardy tanystyrdy. Sonyń ishinde, ásirese qazaq teatry men kınosynyń álem kórermenine tanystyrylý men nasıhattalýy jaıynda keńinen áńgime órbidi. Jahan nazaryn ózine aýdaryp, álemdi tańdaı qaqtyryp júrgen talant Dımash Qudaıbergen, kúni keshe Kann festıvalinde top jarǵan úzdik aktrısa Samal Eslıamovanyń jetistikteri tanystyrylyp, jalpy qazaq óneriniń damý barysyna baǵa berildi. Sondaı-aq mınıstr jýrnalısterdiń latyn grafıkasy men týrızmge qatysty suraqtaryna da jan-jaqty jaýap berdi. Aldaǵy ýaqytta shyǵarmashylyq mádenı baılanysty budan ári nyǵaıtýǵa óz usynysyn bildirdi. «Jahandyq álemdegi zamanaýı qazaqstandyq mádenıet» baspasóz týrynyń aıasynda qonaqtar kıeli Mańǵystaý jerine baryp, qasıetti ólkeniń tarıhı jerlerimen tanysatyn bolady.
Bul kezdesý qazaqstandyq modeldi ashyq talqylaýǵa shyǵarý arqyly bir jaǵynan konstrýktıvti oı-pikirler men jańa ıdeıalardyń týyndaýyna negiz qalasa, ekinshi jaǵynan halyqaralyq qoǵamdastyq qazaqstandyq baǵdarlamada bekitilgen damýdyń paıdaly joldary men ony qoldanýdyń áleýetin keńinen paıdalanýǵa múmkindik beredi dep kútilýde.
Nazerke JUMABAI, «Egemen Qazaqstan»