Aqtaý qalasyndaǵy №23 mekteptegi IT-synyptyń ashylýy oqýshylardyń sońǵy qońyraý kúnine tuspa-tus keldi.
Synyptyń tusaýkeserine Mańǵystaý oblysy ákiminiń orynbasary Rýslan Sákeev, bilim basqarmasy basshysy Nurlybek Qoıjanov, «Nur Otan» partııasy oblystyq fılıaly tóraǵasynyń orynbasary Nurı Tumyshev, «Nur Otan» partııasy Aqtaý qalalyq fılıaly tóraǵasynyń orynbasary Qalıolla Sahıpov qatysty.
IT-synypqa kirmes buryn oblys ákiminiń orynbasary bastaǵan top №23 mektep oqýshylary ázirlegen konserttik baǵdarlamany tamashalap, sóz sóıledi. Rýslan Kenesaryuly mektep túlekterine sáttilik tilep, balalardy sońǵy qońyraý kúnimen quttyqtady. О́z sózinde mektepke kelgendegi maqsatyna, ıaǵnı oblysta ashylyp jatqan IT-synyptary jóninde aıtyp ketti.
– Jańa oqý jylyna mektepterde IT-synyptaryn kóptep ashamyz dep josparlap otyrmyz. Bul «Sıfrly Qazaqstan» jobasy aıasynda júzege asyrylyp otyrǵan «Nur Otan» partııasynyń jańa jobasy. Bul jobalar árıne, bizdiń ata-analardyń qoldaýynsyz júrmeıdi. Sondyqtan jastardy eńbekke, tárbıege, ǵylymǵa, elimizdiń damýyna úles qosýǵa shaqyramyz. Atqarylyp jatqan is-sharalardan sizder habardar bolýlaryńyz kerek, – dedi ákimniń orynbasary.
№23 orta mekteptiń dırektory Zarıfa Kazıeva IT-synyptardyń ashylýyna sebepker bolyp otyrǵan «Nur Otan» partııasyna alǵysyn aıtyp, IT-synyppen tanystyrdy. Synypta kompıýterlermen qatar, robot-tehnıka da bar. Balalar Python baǵdarlamasyn endi úırenedi, ázirge olar Scratch baǵdarlamasymen jumys istep úırenýde. Besinshi synyp oqýshylary Ilııas Seksımbaev pen Arsen Tókenov kelgen qonaqtarǵa ózderi meńgergen baǵdarlamasy boıynsha qurastyrǵan oıyndaryn tanystyrdy.
Z.Qazıqyzy balalardy Jambyl oblysynan shaqyrtylyp, arnaıy jataqhanamen qamtamasyz etilgen Albına Samıgýlova esimdi muǵalimniń oqytatyndyǵyn aıtty.
– Ákimdikke Jambyl oblysynan aldyrǵan muǵalimdi jataqhanamen qamtamasyz etkendigi úshin alǵysymdy bildiremin. Bizge osyndaı mamandar qajet. «Nur Otan» partııasynyń osyndaı jańashyl bastamasymen bilim salasyna qosyp otyrǵan úlesi úshin alǵysymdy bildiremin, – dedi ol.
Gúlaıym ShYNTEMIRQYZY, «Egemen Qazaqstan»