101-márte ótken «Djıro d’Italııa» kópkúndigi 21-kezeńmen tarıhı qala Rımde óz máresine jetti. «Astana» komandasy úshin bul doda qıyn ótkenimen, tabysty aıaqtaldy.
Qazaqstandyq komandanyń barlyq músheleriniń atsalysýymen Mıgel Anhel Lopes sporttyq mansabynda alǵash ret ıtalııalyq Grand-týrda jalpy esepte júldeli 3-oryndy ıemdenip, jeńis tuǵyryna kóterildi. Sonymen qatar 24 jastaǵy Lopes «Djıro-2018» velododasynda úzdik jas shabandoz klassıfıkasııasy boıynsha aq jeıdeni utyp aldy.
– Bul nátıje «Astana» komandasy úshin de, men úshin de úlken jetistik. Sońǵy jyldary da, osy jarys barysynda da qoldaý kórsetken komandama alǵysymdy aıtqym keledi. Komandadaǵy áriptesterime, komanda qyzmetkerlerine, sporttyq dırektorlarǵa, bas menedjerimiz Aleksandr Vınokýrovke alǵysym sheksiz! «Djıroda» úsh apta boıy ter tóktik. Jolymyz bolmaǵan sátter de boldy. Sonymen qatar úzdik jas shabandoz jeıdesin ıemdengenime de qýanyshtymyn. «Djıroda» kózdegenim aq jeıde bolatyn. Ekinshi maqsatym Top-5-tik qataryna ený bolsa, jeńis tuǵyryna kóterilip, josparymdy artyǵymen oryndaǵanyma dán rızamyn. «Djıro d’Italııa» jarysynda meniń jankúıerlerim tek Kolýmbııada ǵana emes, Qazaqstanda da kóp ekenin kórdim – dedi Mıgel Anhel Lopes.
«Týr de Frans» pen «Ispanııa Výeltasynyń» jeńimpazy brıtandyq Krıs Frým «Djıro d’Italııa-2018» velojarysynyń qorytyndysy boıynsha jeńiske jetti. Al byltyrǵy ıtalııalyq Grand-týrdyń jeńimpazy gollandııalyq Tom Dıýmolen 2-oryndy ıelendi.
– Bıylǵy ótken «Djıroda» «Astana» taǵy bir márte óz kúshin kórsetti. Grand-týrdyń fınaldyq podıýmyna Mıgel Anhel Lopes sııaqty jas shabandozdyń kóterilýi – bul úlken jetistik. Barlyq komanda men Mıgel Anhel Lopestiń jetken jetistigine kóńilim tolady. Osy dodada úsh tamasha jarys aptasyn ótkizdik. Qorytyndy nátıjemiz – Lopestiń júldegerler tuǵyryna kóterilýi men aq jeıdeni ıemdengeni, sonymen qatar Bılbaonyń jalpy esepte 6-nátıjege qol jetkizgeni bizdi qýantady. Maýsymdy jaqsy qarqynmen bastadyq. Aldaǵy ýaqytta da sol qarqynmen jalǵastyramyz, – dedi bas menedjer Aleksandr Vınokýrov.
«Astana» komandasynyń taǵy bir shabandozy Pelo Bılbaonyń da tamasha jetistigin atap ótpesek bolmas. Ol óziniń sporttyq mansabynda «Djıro d’Italııa» velojarysynyń bas klassıfıkasııasy boıynsha alǵash ret 6-oryndy ıemdendi.
«Djıronyń» fınaldyq 21-kezeńi Rımniń ortalyq kóshelerinde ótti. Peloton ár aınalymy 11,5 shaqyrym bolatyn 10 aınalymdy júrip ótti. Jappaı sprıntpen aıaqtalǵan kezeńde ırlandııalyq shabandoz Sem Bennett jeńiske jetti.
Ermuhamed MÁÝLEN, «Egemen Qazaqstan»