Kún tártibine sáıkes jıynda elimizdegi qurylymdyq jáne ınstıtýsıonaldyq reformalardyń júzege asyrylý barysy jáne Soltústik Qazaqstan oblysynyń áleýmettik-ekonomıkalyq ahýaly talqylandy.
Otyrysty ashqan Memleket basshysy 2008 jylǵy álemdik qarjy daǵdarysynyń saldaryna qaramastan, ekonomıkalyq turaqtylyqty saqtaý úshin iske asyrylǵan sharalarǵa nazar aýdardy.
– Álemdik qarjy daǵdarysy bastalǵan sátten beri 10 jyl ótti. Jaǵdaı ózgerdi. Daǵdarystan shyǵý úshin biz arnaıy baǵdarlamalar ázirledik, jol kartasyn qabyldadyq, jumystan bosap qalǵan adamdarǵa qol ushyn sozdyq. Kóptegen sharalar júzege asyryldy. Biz shetelden ınvestısııa tarttyq jáne óz qarjymyzdy da paıdalandyq. Sol arqyly ulttyq ekonomıkamyzdy quldyratpaı daǵdarystan shyǵýǵa múmkindik aldyq, – dedi Qazaqstan Prezıdenti.
Nursultan Nazarbaev jahandyq úrdister men qalyptasqan geosaıası ahýaldy eskere otyryp, damýdyń jańa baǵdarlamalaryn ázirleý qajettigin aıtty.
– Prezıdent Ákimshiligi men Úkimet odan ári damýymyzdyń joldaryn izdestirýi kerek. Biz bolashaqta tıisti sharalar qabyldaý úshin boljam jasaýymyz qajet. Bizdiń aldaǵy is-árketterimiz jóninde aıqyn ustanymymyz bolýǵa tıis, – dedi Memleket basshysy.
Qazaqstan Prezıdenti qazirgi memlekettik jáne salalyq baǵdarlamalardy júzege asyrýdyń tıimdiligine toqtalyp, olardyń ýaqtyly jáne sapaly oryndalýynyń mańyzdylyǵyn atap ótti.
Nursultan Nazarbaev agroónerkásip sektoryn odan ári damytý jáne qaıta óńdeý salasyna ınvestısııa tartý úshin tıisti sharalar qabyldaý qajettigine nazar aýdardy.
Elbasy memlekettik organdardyń qyzmeti el turǵyndarynyń ál-aýqatyn arttyrýǵa baǵyttalýy tıis ekenin aıtty.
– Bizdiń búkil jumysymyz halyqtyń tabysyn arttyrýdy kózdeıdi. Eger olaı bolmasa, onda Úkimettiń shamasy kelmeı otyr degen sóz, – dedi Qazaqstan Prezıdenti.
Sonymen qatar, Nursultan Nazarbaev halyqty jumyspen qamtý, mindetti áleýmettik medısınalyq saqtandyrý júıesin engizý, shaǵyn jáne orta bıznesti qoldaý, jastarǵa kásibı bilim berip, jumysqa ornalastyrý máselelerine toqtaldy.
Jıyn barysynda Premer-Mınıstr B.Saǵyntaev, Ulttyq bank tóraǵasy D.Aqyshev, Bas prokýror Q.Qojamjarov jáne Soltústik Qazaqstan oblysynyń ákimi Q.Aqsaqalov baıandama jasady.
Basqosý qorytyndysy boıynsha Qazaqstan Prezıdenti Úkimetke jáne basqa da múddeli memlekettik organdarǵa birqatar naqty tapsyrma berdi jáne olardyń oryndalýyn qadaǵalaýdy Prezıdent Ákimshiligi men Qaýipsizdik keńesiniń apparatyna tapsyrdy.