Aıbyny asqaq Astana qalasynyń 20 jyldyq mereıtoıyna oraı Tarazdaǵy «Balasaǵun» ortalyq konsert zalynda Qazaqstan Respýblıkasynyń Tuńǵysh Prezıdenti qory syılyǵy laýreattarynyń qatysýymen konsert ótti. Jınalǵan kópshilik aldynda elordalyq ónerpazdar ózderiniń ónerdegi jetistikterimen bólisip, Qazaqstan Respýblıkasynyń Tuńǵysh Prezıdenti – Elbasy qorynyń qamqorlyǵyn áńgimeledi.
Atalǵan konsert barysynda negizinen klassıkalyq shyǵarmalar oryndalyp, tyńdarmannyń qulaq quryshyn qandyrdy. Elimizge barıton daýysty ánshi retinde tanymal Azamat Jyltyrkózovtiń oryndaýyndaǵy Muqan Tólebaevtyń «Eshkim de umytylmaıdy» áni tyńdarmandy beı-jaı qaldyrmady. Sonymen qatar Qalamqas Jumabaevanyń skrıpkamen oryndaýyndaǵy Qurmanǵazynyń «Saryarqa» kúıi, Ermek Qurmanaevtyń oryndaýyndaǵy Ahmet Jubanovtyń shyǵarmalary sátti shyqqan dúnıeler boldy.
Konsert barysynda soprano daýysty Bıbigúl Januzaq álem klassıkteriniń shyǵarmalaryn tyńdarman nazaryna usyndy. Bul rette ónerpazdy fortepıano aspabynda Gaýhar Tasbergenova súıemeldep, ózderiniń sheber mýzykant ekendikterin tanytty.
Astana qalasynyń mereıli merekesiniń qurmetine oraı Áýlıeata aspanyn ánge bólegen elordalyq ónerpazdar «Balasaǵun» ortalyq konsert zalyna jınalǵan kópshiliktiń kóńilin kóterip, asqaq rýh syılady. Adamzattyń jaýharyna balanǵan klassıkalyq án óneriniń keremetin áıgiledi.
Konsert sońynda jambyldyqtardyń nazaryna «Astana – Uly Dalanyń jaýhary» atty fotokórme usynylyp, áýlıeatalyq kópshilik álemge tanylǵan bas shahardyń búgingi kelbetimen tanysty. Sonymen qatar Astana qalasynyń sáýletine súısingen kórermen de az bolǵan joq. Al Qazaqstan Respýblıkasynyń Tuńǵysh Prezıdenti – Elbasy qory uıymdastyrǵan bul fotokórme elimizde ǵana emes, Máskeý, Sankt-Peterbýrg, Madrıd, Berlın, Beıjiń, Parıj qalalarynda jáne Astana men Almaty shaharlarynda jalǵasyn tabatyn bolady.
Hamıt ESAMAN,
«Egemen Qazaqstan»
Jambyl oblysy