Qazaqstan-О́zbekstan: О́zara yqpaldastyq damı beredi

О́zbekstandyq delegasııany Jibek joly keden beketinde qarsy alǵan depýtattar atal­ǵan beketti abattandyrý, damytý jaıyn talqylady. Al negizgi máseleler parlamentaralyq shekara jáne syrtqy ekonomıkalyq yntymaqtastyq taqyrybynda ótken otyrysta ortaǵa salyndy. Parlament Senatynyń Halyq­aralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva kezdesýdiń mańyzdy nátıjesiniń biri retinde parlamenttik komıssııa qurylǵanyn atap ótti. Bul óz kezeginde eki el arasyndaǵy qarym-qatynasty nyǵaıtýǵa baǵyt­talǵan jumystardyń jú­ıeli júrgizilýine septigin tıgiz­bek. Sondaı-aq komıtet tóraǵa­sy­nyń aıtýynsha, depý­tat­tar­dyń kezdesýleri belgi­len­­gen merzimde ótkizilip, kóteril­gen máseleler boıynsha júzege asy­rylǵan jumystar talqylanbaq.

Kezdesý barysynda eki el arasynda ózara tıimdi saýdanyń serpindi damyp kele jatqandyǵy da aıtyldy. Mysaly, 2017 jyly Qazaqstan men О́zbekstan arasyn­daǵy saýda aınalymy 2 mlrd AQSh dollaryna jetip, 2016 jylǵy kórsetkishpen salystyr­ǵanda 31,2% joǵary bolǵan. Qazaq­stannan О́zbekstanǵa eksport kólemi 35 paıyzǵa artyp, 1,3 mlrd AQSh dollaryna jetti. О́zbek­stannan ákelinetin taýarlar kólemi 25,1 paıyzǵa artyp  735,2 mln AQSh dollaryn qurady. Al 2018 jyly saýda aınalymyn 3 mlrd AQSh dollaryna, 2020 jyly ony 5 mlrd AQSh dollaryna jetkizýdiń ózara tıimdi jol­daryn qaras­tyrý kózdelgen. Buǵan bıyl О́zbek­stannyń Qazaq­standaǵy jyly jarııalanýy, Memleket bas­shylarynyń iskerlik qarym-qaty­­nasyna oń yqpal etetini anyq.

Jalpy, О́zbekstannyń Qazaq­standaǵy jylyn ótkizý aıasynda ekonomıka, týrızm, mádenı-gýmanıtarlyq salalarda 200-den astam is-shara ótkizý josparlanyp otyr.

Alǵa qoıylǵan maqsattarǵa qanyq  senatorlar kezdesý barysynda birqatar usynys-tilek­terin ortaǵa saldy. Mysa­ly, sońǵy kezderi barys-kelis­tiń ulǵaıýyna baılanysty jumy­sy kúrdelene túsken ótkizý pýnkt­teri qataryn kóbeıtý, Reseı, Ázer­baı­jan, Iran, taǵy basqa da shetelderge shyǵý múmkindigi bar Qazaq­stan teńiz porttaryn ortaq ıgilikke paıdalaný qajet. Kólik logıstıkasy, ıaǵnı taýar tasy­maly turǵysyndaǵy máse­leler de aıtyldy. Bul oraıda D.Nazarbaeva eki­jaq­ty keder­gi­lerdi alyp tas­taý úshin Úkimetke naqty usynystar joldaý qajettigin atap ótti.

Al О́zbekstan Olıı Máji­lisi­niń Halyqaralyq qaty­nas­­tar, syrt­qy ekonomıka­lyq baıla­nys­tar, shetel ınvestısııa­lary jáne týrızm komıtetiniń tór­aǵa­sy Áli­sher Qurmanovtyń aıtýyn­­sha, Sary­aǵash­taǵy kezdesý eki el arasynda sheshil­­meı­tin máse­le bol­maıty­nyn kór­set­ti. «Parlament depýtat­tary Prezı­dent­­terimizdiń eki el­di jaqyn­das­ty­ra túsý maqsa­tyn­daǵy barl­yq bas­tamalaryn tolyq qol­daı­­dy. Búgin kóp másele, usy­nys­­­tar aıtyldy. Sonyń ishin­de qazaq­­­stan­dyq árip­tes­teri­­miz «Baıqońyr» ǵarysh aıla­ǵyn or­taq ıgilikke paıdala­ný qajet­ti­gin aıtty. Aero­ǵarysh salasyn­da­ǵy qa­rym-qaty­nas barysyna kóz jú­girtsek,  bul ba­ǵytta naq­­ty bir ju­mys atqaryl­maǵa­nyn ańǵa­ra­syz. HHI ǵasyrda jańa tehnolo­gııa­­lar­d­y meńgerý mańyzdy. Jal­py, bú­gingi kezdesý biz úshin óte paı­daly boldy – dedi Álisher Qurmanov.

Kezdesý barysynda kóteril­gen máseleler boıynsha senatorlar Úki­metke óz usynystaryn joldaıtyn bolady. Sondaı-aq bul kúni ózbekstandyq dele­gasııa­ǵa «Qazaqstan Injı­nırıng» Ulttyq kompanııasy» AQ ónim­deri tanystyrylyp, óndiris sala­syndaǵy áleýeti baıandaldy.

Ǵalymjan ELShIBAI, «Egemen Qazaqstan»

Ońtústik Qazaqstan oblysy