Táýelsizdiktiń alǵashqy jyldary, ıaǵnı 1993 jyly Ońtústik Qazaqstan oblysyndaǵy Maqtaaral aýdanynda «Myrzashól juldyzdary» atty jas ánshilerdiń óner baıqaýy uıymdastyrylǵan bolatyn. Tyń bastama aýyl, aýdandardaǵy kóptegen talanttardy elge tanytty. О́nerde óz darynyn dáleldep, bıikten kórinýine múmkindik jasady.
Mysaly, alǵashqy baıqaýda bas júldeni enshilegen Jubanysh Jeksenuly búginde Qazaqstannyń eńbek sińirgen qaıratkeri, qazaq estradasyndaǵy jaryq juldyzdardyń biri. Al baıqaýdyń ekinshi jyly Otyrar aýdanynan kelip, baǵyn synaǵan Hadısha Shalabaeva bas júldeni ıelendi. Jas daryndardyń jolyn ashý maqsatyndaǵy jaqsy bastama túrli sebeptermen toqtap qalǵan edi.
Maqtaaral aýdandyq ishki saıasat, mádenıet jáne tilderdi damytý bóliminiń meńgerýshisi Perdesh Esenbekovtiń aıtýynsha, eki myńynshy jyldary bul óner baıqaýy «Maqtaaral áýenderi» degen atpen óte bastaǵan. Deńgeıi tómendep, tek aýdan kóleminde ǵana. «Endi mine, Myrzashól topyraǵynda araǵa 23 jyl salyp án alamany qaıtadan jandanyp otyr. Baıqaýdyń basty maqsaty – Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda jas býyndy otanshyldyqqa tárbıeleý, jastardyń estradalyq án oryndaý sheberligin shyńdaý, el ishindegi jas talanttardy qoldaý, sondaı-aq Myrzashól týraly jańa ánderdi halyq arasynda keńinen nasıhattaý», – deıdi P.Esenbekov. Qaıta qolǵa alynǵan, Astana qalasynyń 20 jyldyǵy men Maqtaaral aýdanynyń 90 jyldyq mereıtoıyna oraı ótkizilgen baıqaýǵa oblystyń qala, aýdandarynan 16-29 jas aralyǵyndaǵy 21 ánshi qatysty.
Maqtaaral aýdany ákimdiginiń qoldaýymen jáne aýdandyq ishki saıasat, mádenıet jáne tilderdi damytý bóliminiń uıymdastyrýymen ótken óner merekesinde oblys ákimi J.Túımebaev qazaq ánderi – halqymyzdyń baǵa jetpes baılyǵy, sarqylmas qazynasy ekeni, irgesi berik, súıegi myǵym memleket qurýdyń negizgi alǵysharttarynyń biri halyqtyń mádenı-rýhanı turǵydan damýy ekenin atap ótti.
Baıqaý qorytyndysy boıynsha bas júldeni maqtaaraldyq ánshi Áriphan Nurıslam, I oryndy shymkenttik «Saryn» toby ıelendi. Al II orynǵa Ordabasy aýdanynyń turǵyny Aınur Aýbakırova, III orynǵa shardaralyq Jandos Áshirbekov pen túrkistandyq Birjan Saparbekova laıyqty dep tanyldy. Jeńimpazdarǵa berilgen júlde de qomaqty. Atap aıtsaq, bas júldege – 1 mıllıon teńge, 1-orynǵa – 500 myń teńge, 2-orynǵa – 400 myń, 3-orynǵa – 300 myń jáne qalǵan oryndarǵa 50-100 myń teńge aralyǵynda aqshalaı syılyqtar berildi. О́nersúıer qaýym qaıta jańǵyrǵan baıqaýdyń endi jyl saıyn ótkizilip turatynyna senimdi.
Ǵalymjan ELShIBAI, «Egemen Qazaqstan»
Ońtústik Qazaqstan oblysy