Nursultan Nazarbaev Qytaı Halyq Respýblıkasynyń Tóraǵasy Sı Szınpınmen keńeıtilgen quramda kezdesý ótkizdi, dep habarlaıdy Aqordanyń baspasóz qyzmeti.
Resmı kezdesý rásiminen keıin eki eldiń kóshbasshylary keńeıtilgen túrde kelissóz júrgizdi.
Qazaqstan Prezıdenti Qytaı tarapyna memlekettik saparmen kelýge shaqyrǵany úshin rızashylyq bildirip, dástúrli qonaqjaılyq kórsetkenin atap ótti.
– Men, eń aldymen, Sizdi joǵary memlekettik laýazymǵa qaıta saılanýyńyzben jáne Qytaı Kompartııasynyń HIH sezin tabysty ótkizýińizben quttyqtaımyn. Bul qytaılyq ózindik ereksheligi bar sosıalızm qurý jolyndaǵy álemdik máni bar aıtýly oqıǵa boldy, – dedi Qazaqstan Prezıdenti.
Nursultan Nazarbaev «Qytaı armanyn» júzege asyrý isinde el memlekettiliginiń tiregi sanalatyn Qytaı Kompartııasy róliniń artqanyna toqtaldy.
Qazaqstan Prezıdenti 2012 jyldan beri joǵary deńgeıdegi 18 kezdesý ótkenin aıtyp, Qazaqstan-Qytaı qatynastarynyń qarqyndy damyp kele jatqanyna nazar aýdardy.
– Osy ýaqyt ishinde biz jalpy somasy 67 mıllıard dollar kólemindegi 127 eki jaqty qujatqa qol qoıdyq. Bizge osy dıalogty jalǵastyrý qajet. Byltyr ózara saýda kólemi 11 mıllıard dollarǵa jýyqtady. Bul jerdegi ósim 30 paıyzdan astam. Eki jaqty qatynastarymyzdy ilgeriletý úshin bizdiń budan da zor áleýetimiz bar, – dedi Nursultan Nazarbaev.
Memleket basshysy Qytaı Halyq Respýblıkasy Tóraǵasynyń dostyq, teń quqylyq, ózara yntymaqtastyq jáne memlekettik egemendikti qurmetteý rýhynda tatý kórshilik qatynastardy dáıekti damytý isindegi jeke úlesin joǵary baǵalady.
– Sizdiń Jibek jolynyń ekonomıkalyq beldeýin qalyptastyrý jónindegi bastamańyzdy iske asyrý barysynda bizdiń yntymaqtastyǵymyz nyǵaıa tústi, – dedi Nursultan Nazarbaev.
Qytaı Halyq Respýblıkasynyń Tóraǵasy tatý kórshiliktiń úlgisine aınalǵan eki jaqty yqpaldastyqtyń joǵary qarqynmen damyp kele jatqanyna toqtalyp, birlesken ınfraqurylymdyq bastamalardy, sonyń ishinde «Bir beldeý, bir jol» baǵdarlamasyn iske asyrý isinde ózara senim men yntymaqtastyqtyń nyǵaıǵanyn atap ótti.
– Biz adamzattyń ortaq taǵdyryn qalyptastyrý jolynda Qazaqstanmen birge bolýǵa jáne adamzattyń jarqyn bolashaǵy úshin aqyl-oıymyz ben kúsh-jigerimizdi jumyldyrýǵa daıynbyz. Men Qazaqstan-Qytaı dostyǵynyń alyp kemesin Sizben birge basqarýǵa ázirmin, – dedi Sı Szınpın.
Kelissózder barysynda Qytaı tarapy Qazaqstannyń ekologııalyq turǵydan taza aýyl sharýashylyǵy ónimin óz naryǵyna jetkizýge, energetıka salasyndaǵy, munaı-gaz keshenindegi, sondaı-aq mádenı-gýmanıtarlyq baılanystar, jańa tehnologııalar men sıfrlandyrý salalaryndaǵy eki jaqty yntymaqtastyqty tereńdetýge múddelilik tanytty.
Kezdesý sońynda Qazaqstan Prezıdenti Qytaı Halyq Respýblıkasynyń Tóraǵasyn Qazaqstanǵa resmı saparmen kelýge shaqyrdy.
***
Sapardyń nátıjeleri boıynsha mynadaı qujattarǵa qol qoıyldy.
1. Qazaqstan Respýblıkasy men Qytaı Halyq Respýblıkasynyń birlesken málimdemesi;
2. Qazaqstan Respýblıkasy men Qytaı Halyq Respýblıkasy arasyndaǵy ıadrolyq jáne radıoaktıvti materıaldardyń, radıoaktıvti qaldyqtar men qaýipti zattardyń zańsyz tasymaldaýyn boldyrmaý jónindegi is-qımyl týraly kelisim;
3. Qazaqstan Respýblıkasy Úkimeti men Qytaı Halyq Respýblıkasy Úkimeti arasyndaǵy Qytaı Halyq Respýblıkasynyń jeńildetilgen nesıe berýi týraly negizdemelik kelisim;
4. Qazaqstan Respýblıkasy Qarjy mınıstrligi men Qytaı Halyq Respýblıkasy Qarjy mınıstrligi arasyndaǵy ózara túsinistik jáne yntymaqtastyq týraly memorandým;
5. Qazaqstan Respýblıkasynyń Investısııalar jáne damý mınıstrligi men Qytaı Halyq Respýblıkasynyń Damý jáne reformalar jónindegi memlekettik komıteti arasyndaǵy óndiristik qýattar men ınvestısııalar salasyndaǵy Qazaqstan-Qytaı yntymaqtastyq josparyn birlesip ázirleý jónindegi ózara túsinistik týraly memorandým;
6. Qazaqstan Respýblıkasy Investısııalar jáne damý mınıstrligi men Qytaı Halyq Respýblıkasynyń Damý jáne reformalaý jónindegi memlekettik komıteti arasyndaǵy birlesken jobalar tizbesin jáne olardyń ındýstrııalandyrý jáne ınvestısııalar salasyndaǵy qalyptasý tetikterin bekitý jónindegi ózara túsinistik týraly memorandým;
7. Qazaqstan Respýblıkasynyń Ulttyq ekonomıka mınıstrligi men Qytaı Halyq Respýblıkasynyń Kommersııa mınıstrligi arasyndaǵy elektrondyq saýda salasyndaǵy ózara túsinistik jáne yntymaqtastyq týraly memorandým;
8. Qytaı Halyq Respýblıkasy men Qazaqstan Respýblıkasy Aýyl sharýashylyǵy mınıstrligi arasyndaǵy Qazaqstannan Qytaıǵa eksporttalatyn sıyr etine arnalǵan ınspeksııalaý, karantındik jáne veterınarııalyq-sanıtarlyq talaptar týraly hattama;
9. Qazaqstan Respýblıkasy Aýyl sharýashylyǵy mınıstrligi men Qytaı Halyq Respýblıkasy Bas keden basqarmasy arasyndaǵy Qazaqstannan Qytaıǵa jońyshqa shóbin eksporttaý jónindegi sanıtarlyq jáne fıtosanıtarııalyq talaptar hattamasy.