Ońtústik Qazaqstan oblysynyń taý bókterindegi aýyldarynyń bal qymyzyna suranys joǵary. Mysaly, Tólebı aýdanyndaǵy Dıhankóldiń qymyzyn aýylǵa alystan at arytyp arnaıy kelip alyp ketetinder kóp. Degenmen, búginde Ońtústikte qymyz baptaýda básekelestik kúsheıe túsken.
Onyń bir kórinisi kúni keshe Elbasynyń «Bolashaqqa baǵdar: rýhanı jańǵyrý» baǵdarlamasy aıasynda Báıdibek aýdanynda ótken «Qymyzmuryndyq» festıvalinde baıqaldy. Qazaq halqynyń ulttyq sýsyny – qymyzdyń qundylyǵyn nasıhattaýdy maqsat etken festıval aıasynda qolóner sheberleriniń kórmesi, qulyndy bıe jáne sáıgúlikterdiń sherýi, ulttyq at sport túrlerinen kórinister, qymyz ishý saıysy ótti. Qatysýshylardy quttyqtaǵan oblys ákimi Janseıit Túımebaev dástúrdiń mán-mańyzyna keńinen toqtaldy.
Jeńimpazdardy anyqtaýdyń da ońaı bolmaǵany anyq. О́ıtkeni saıysqa óz aýdanynda eń tanymal da tutynýshylary kóp qymyz baptaýshylar qatysty. Olardyń arasynan bas júldeni Túlkibas aýdanynyń qymyz baptaýshylary ıelendi. Taý baýraıynda baptalǵan bal qymyzdy kópshilik joǵary baǵalady. Bas júlde ıegerlerine qulyndy bıe tartý etildi. Birinshi oryndy Báıdibek aýdanynyń, ekinshi jáne úshinshi oryndardy Túrkistan qalasy men Ordabasy aýdanynyń qymyz baptaýshylary ıelendi. Al qolónershiler baıqaýynda túrkistandyq sheberlerdiń baǵy jansa, sáıgúlikter saıysynda Shymkent qalasynyń atbegileri aldyna jan salmady.
«Qymyzmuryndyqqa» kelgen kópshilikti, ásirese qymyz qumarlar básekesi qyzyqtyrdy. Ulttyq sýsynǵa tábeti jaqsylardyń jarysyna barlyq aýdannan yntaly azamattar qatysyp, 10,5 tostaǵan qymyzdy birinen soń birin simirgen Arys qalasy, Montaıtas aýylynyń turǵyny Almas Jamanqulov jeńiske jetti. Festıval jeńimpazdary men júldegerler oblys ákiminiń arnaıy syılyǵymen, dıplomdarmen marapattaldy.
Ǵalymjan ELShIBAI, «Egemen Qazaqstan»
Ońtústik Qazaqstan oblysy