Dáriger mamandyǵynyń qyr-syryn bilip, anyq sol joldy tańdaý úshin úlken júrek kerek. Ár dáriger adam ómiriniń arashasy ekendigin bilýi ári túısinýi tıis.
Osy ispetti aýyrtpalyq júgin qoryqpaı arqalaǵan Qostanaı oblysyndaǵy Rýdnyı qalalyq aýrýhanasynyń kardıologııa bólimshesiniń dárigeri Zınat Kenishbekqyzy 23 jyldan beri naýqastar janyna arasha bolyp kele jatqan tájirıbeli maman.
Zınat Kenishbekqyzynyń aıtýynsha, eń aldymen aq jeleńdi jandar aqjúrek bolýy qajet.
«Dárigerdiń jumysy naýqastyń janyn qınaǵan azapty jeńýden turady. Iаǵnı aldynda qandaı qıyn is kútip tursa da, bárine birdeı tótep berýge daıyn bolýy dárigerdiń qaısarlyǵy men kúreskerliginiń aınasy», deıdi kardıolog-dáriger.
Álbette qanshama adamnyń janyn saqtap qalǵan meıirimdi jan barlyq qurmetke ıe. Bas aýyryp, baltyr syzdap kelgen myńdaǵan adamdardyń kóńiline demeý, janyna súıenish bola bilgen dárigerdiń bir aýyz jyly sózi aýyryp jatqan adamǵa dáriden de artyq áser etedi.
– Jumys barysynda túrli jaǵdaımen betpe-bet kelýge týra keledi. Sol sebepti sabyrly sheshim qabyldaı bilýdiń mańyzy zor. Eń qıyn ári júregime tıgeni eki birdeı jannyń ómirin arashalap qalýǵa jantalasqan oqıǵa der edim. Júrek aqaýy bar júkti áıeldiń bizdiń aýrýhanaǵa kelgeni áli esimde. Dárigerlerdiń aıtqan sózine qulaq aspaı óz betinshe áreket jasaǵan jas ananyń ómiri qyl ústinde turǵanyn ol bilmegen edi. Júreginiń álsiz ekendigine qaramastan qursaǵyndaǵy nárestege jańa ómir syılaý jankeshtilik qoı. Alaıda munyń bir ǵana joly boldy. Ne ananyń ómirin arashalaý, ne nárestege jańa ómir syılaý. Bul – óte qıyn sheshim. Mundaı medısınalyq operasııany júzege asyrýǵa bizdiń aýrýhana qaýqarsyz edi. Sol sebepti de anany tez arada oblystyq aýrýhanaǵa jetkizý kerek boldy. Jol ústinde júkti áıeldiń qan qysymy kenetten tómendep ketip, júregi bir mezette toqtap qalady. Bar jigerimdi jınap, sol arada alǵashqy kómek kórsetýge asyqtym. Defıbrılıatordyń kómegimen sóngen júrekti qaıta ómirge ákeldim. Biraq bul ýaqytsha ǵana boldy. Aýrýhanaǵa jetkenshe ananyń ómirin arashalap qalý múmkin emes edi. Sol sebepti qursaqtaǵy nárestege jańa ómir syılaǵan dárigerdiń qandaı aýyrtpalyqpen betpe-bet kelgenine kózimiz jetip otyr, – deıdi Zınat Kenishbekqyzy.
Laýra EShNAZAROVA,
L.N.Gýmılev atyndaǵy Eýrazııa ulttyq ýnıversıtetiniń
I kýrs stýdenti