Jezqazǵan qalalyq ishki ister bóliminde júrgizýshi bolyp jumys isteıtin polısııa starshınasy Jolaýshy Ahanovty qolynan kelmeıtini joq sheber dep senimmen aıtýǵa bolady. Ol jumystan tys ýaqytta dáýreni ótip, «demalysqa» ketken qyzmettik avtomashınalardy jóndep, qatarǵa qosýmen aınalysady.
Teginde, tártip saqshylarynyń jumysy óte qaýyrt. Sáıkesinshe qyzmettik kólikterge, onyń ishinde patrýldik avtomashınalarǵa kúni-túni tynym joq. Sol sebepti olardyń ǵumyry da qysqa bolyp keledi. Qansha jerden jamap-jasqap, jóndegenmen temirdiń de tozbaı turmaıtyny belgili.
Al polısııa qyzmetkeri Jolaýshy Ahanov bul máselege basqa qyrynan kelip, joqtan bar jasap júr. Alǵash ret ol «ÝAZ» avtomashınasyn osydan úsh jyl buryn qalpyna keltirgen bolatyn. Búginge deıin ol sanattan syzylyp qalǵan úsh qyzmettik avtokólikti jóndep, iske jaramdy etken.
Polısııa qyzmetkerine muny iste dep jatqan eshkim joq, bul – onyń qoly bosta óz qalaýymen aınalysatyn súıikti isi. Osy úshin Jolaýshy Ahanov aqy alǵan emes. Degenmen polısııa basshylyǵy starshınanyń bul paıdaly isine múmkindiginshe qoldaý kórsetip otyrady. Mysaly, ol Qaraǵandy oblystyq IID basshylyǵy tarapynan birneshe ret marapattalǵan.
Qaırat ÁBILDA,
«Egemen Qazaqstan»
Qaraǵandy oblysy,
Jezqazǵan qalasy