Qaınar aǵa, qasıetiń aýar eken qaı balaǵa?

Asyly, adam dúnıege keletin jerin bilýi kerek sekildi ǵoı. Anyǵynda, taǵdyry ony túgin tartsań, maıy shyǵatyn ólkede kindigin kesip beretin sııaqty. Ol qaıralyp, týdy. Qaıralyp degende, mynaý dúnıeniń esigin ashqan mekende qaıraǵy kóp edi. Qońyr salqyn, óleńde ósti. Alǵashqy maqalasy jarııalanǵanda el-jurty kádimgideı eleńdesti. Týǵan jerin biz de kórdik. Qazir oılap otyrsaq, О́kpeti–Qyzyltasqa tabanymyz tıgende aǵamyz órimdeı jigit. Jáne tap sol kezde Barqytbeldiń bir bókterinde ózine tıesili otaryn qaıyryp júrýi de ábden múmkin. Anyǵynda, qaıyrmaıdy. Úrdis engizgenin de estidik. Qoı sharýashylyǵyna. Toqtyny aldyna salǵanda bilip otyrǵan, óriske qalaı úıretýdi. Aınalyp, jaıylady eken. «Kitap oqýdyń qamy. Shóbi shúıgin jerge salasyń, sosyn aldyn orap baryp, jantaıa ketesiń. Toqtylar sol tusqa keledi. Oǵan deıin oqýǵa múmkindigiń bar». Oıǵa oranyp, qoı baǵyp júrgen jigittiń qoltyǵynda kitap, alaqanynda dápter, bas barmaq pen balan úırektiń ortasynda qalam qystyrylǵanyn da elestetip otyrmyz. Jazady ǵoı. Jáne qalaı jazady!

Qaıraq demekshi. Mektep tabaldyryǵyn endi attaǵan kezimiz eken. Jezdemiz sý jańa «Jıgýlı» mindi. Kókem beınelegendegi, Kókkólshiktegi týystaryn izdedi. Erip aldyq. Álde ózi ertken bolar. Ol mańyzdy emes. Mańyzdysy – sol jerdiń qarııalary qazyna eken. Arǵy-bergi tarıhqa júırik. Jerdiń jaǵdaıyn jaqsy biledi. Kúndiz taýǵa shyqqanda kórsetken, jaltyr tastardyń asyl ekenin. Kádimgi qaıraq tastar. Qaltaǵa toltyryp alyp, kóliktiń júk salǵyshyna jasyrdyq. Taǵy baryp, taǵy ákeldik. Erteńinde taýǵa shyǵyp edik. Qaıraq tastar kózden ketpedi. Terip keldik. Solaı eki-úsh kún ótti. Endi qydyryp kelýshilerdi Qyzylkesiktegi aǵaıyn qonaqqa shaqyrdy. Bárimiz kólikke otyrdyq. Sý jańa dedik qoı, ot aldy. Biraq, yńyranyp baryp, óshedi. Eshkim túsinbeıdi. Bizder de. Jezdem basyn shaıqaıdy. Sálden keıin belgili boldy. Júk salǵysh qaıraq tastarǵa tolyp qalypty. Salmaqty bolady eken ǵoı, ózi. Aıtpaqshy, aǵam da salmaqty. Qaıraqtan qonǵan qasıet, shamasy.

Aldymen atyn estidik. Sosyn maqalasyn oqydyq. Keıin maqtandyq. Stýdent kezimizde: «Bizder de mynadaı bar, mynadaı bar». Mynadaıdyń biri – ózi edi. О́zegin jaryp shyqqan shyǵarmalary maqtanýymyzǵa ábden azyq. Endi kórmekke qyzyqtyq. О́zin. Syrtynan maldanyp júrgen aǵaǵa ózgelermen birge barsaq, maqalasyn jipke tizgenmen túrin tanymasaq, álde tańyrqap tursaq... Ol bolmaıdy. Oǵan deıin kórýimiz kerek. «Dáýirge» bir-eki ret izdep bardyq. Reti solaı ma. Biz kirip barǵanda aǵanyń is-saparǵa ketkeni málim bolady da turady. Sál keıin eptep ózimiz de jumysqa tartyldyq. Shtattan tys. Sol kezde joq izdep júrgenimizden habardar aǵa ári áriptes sybyr etti. Múmkin aıqaılap ta aıtqan shyǵar.  «Aǵań anda otyr». Tura, zyttyq. Otyratyn jerin biletin edik. «Dáýirdiń» dálizimen júre berseń tabasyń. Kómirdeı qara shashy artqa qaıyrylǵan, kózáınektiń ádemisin kıgen, murty tumsyǵyn tiregen kelisti aǵa «grankiniń» ishine túserdeı bolyp, otyr eken. Sálem berdik. Lyp etip, orynan turdy. Túri jyp-jyly. О́zimiz birtúrli bolyp qaldyq. Oılaǵamyz ǵoı. Mańǵaz aǵanyń mańynda bolamyz dep. Joq. Ondaı emes. Oǵan ózimiz birtúrli boldyq. Syptyqtaı dene, shalt qımyl. Kózinde ot. Taqqan áınektiń arǵy jaǵynan jarqyrap turdy.

- Sóıle, batyr!

- Sol aǵa... ne, tanysaıyn dep...

- Jaqsy bolǵan. Tanysqan jaqsy. Al, jónińdi aıt.

- Jón aıtqanda, jolaı sol, sálem bereıin dep...

- Áı, jaqsy eken.. búgin kezekshimin, mynaý betterdi oqyp jatyr edim ǵoı...

Taǵy birdeńeler aıtylǵan shyǵar. Biraq... Ol jaǵy esimde joq. О́zgelerden jyraq, aldymen ózim kórip alǵanym qandaı jaqsy bolǵan. Olardyń kóke sanaǵandaryn bilemiz. Syzdanyp, qarsy alady. Yrǵalyp, ornynan turady. Yńyrsyp sóıleıdi. Ádemi ǵoı. Naǵyz kóke! Meniń aǵam, aǵam bolǵanda syrttaı maldanyp, ózgelerge ses kórsetýge jaratyp júrgen kókem lyp-lyp. «Granky» oqyǵany nesi? Kezekshi bolatyny qalaı? Meniń bala kóńilim, shynyn aıtqanda aǵamnyń men qabyldap júrgen kókelik kelbeti sál ózgeshe edi. О́zgeshe elestetetinbiz. «Kókelikke» «shıki» me, sonda? Kádimgi ózimiz sekildi. Kisiligi joq, kishiligi kóp. Biz súısinip oqyǵan júzdegen maqalanyń avtory osylaı bola ma? Tym bolmasa, qos qoldy ústelge tirep, jótkirinip baryp, sóılemeı me?

Taǵy kórdik. Ústel tennısiniń mańynan. Qarsy kelgenin japyryp jatyr. Biraq... Biz kútkendeı emes. Kishimen de qurdas. Úlkenmen de syrlas. Tym qarapaıym. Sol kezdegi bizdiń túısiktiń talaptaryna múlde saı kelmeıdi. Aǵanyń shyǵarmashylyǵymen jete tanys kez. Aıttyq qoı, uranymyz ári týymyz. Onymen maqtanýdan chempıonbyz. «Kózirimiz» myqty ǵoı. О́zgelerge aıbynyn asyryp júrip, ózimiz de bıikten oryn berippiz. Anaý aspandaǵy aǵany kádimgi jumyr jerden kórgende, jer bolǵanda da kez-kelgendi jaqtyryp, ıaǵnı kisi jatyrqamaıtynyn kórip, kádimgideı oılanyp qaldyq. Demek, kóke tanýdaǵy kemshiligimiz ol.

Birde úıden taýyp aldyq. Anyǵy, qolǵa ilindi. Álde bireýmen ilesip kelgen. Nemese úıdegilerdiń biri aldyrǵan. Tasymal jaǵy bizge qatyssyz. «Prezıdent pyraǵy» tur. Ishine «endik». Ǵajap! Joq, ol ádebı týyndy emes. Bar bolǵany tilshiniń joljazbasy ǵana. Qalaı jazady! Eske tústi. Qultóleý aǵam sylq-sylq kúledi. Bertinde. Sosyn basyn shaıqaıdy. Qaıta kúledi. Kózinen jas shyqty-aý deımin.

- Nege kúle beresiz?

- Qaınekeńdi aıtam da...

- Birdeńe boldy ma?

- Bolǵanda. Kompıýter aldynda otyr eken. Tamsanyp.

- Tamsanǵany qalaı?

- Shynynda da keremet jazady ǵoı. Shaqyrdy. Oqytty. Oqydyq, qolyn alamyz ǵoı. Qaınekeń aıtady, «áı, ózim de jazamyn,á».

- Jazady, á?

- Jazady!

Jazǵandarynyń birazyn qoljazbadan oqydyq. Odan da erterek eken. О́zi jelisin aıtyp otyrady. Kezektegi týyndylardyń. Maıyn tamyzyp turyp, aıtady. Sosyn jazýǵa ketedi. «Jazý úshin –oqý kerek». Urany, ári ustanymy. Kóp oqıdy. Aıtady da. Aıtashy. Aıtpaqshy, aǵam kúndelikti paıdalanyp júrgen birneshe sátti aýdarmanyń da avtory. Mysaly, zeınetker sózin aınalymǵa shyǵardy. Qazir, bárińiz de aıtasyz, ııa? Oqýdyń emes. Tyńdaýdyń ózi nege turady! Kókkólshiktegi tirshilikti aldymen tyńdadyq. Alasanbaı atanyń urpaǵyn kózge elestetip. Jady ne degen myqty! Birde О́tejan aǵany kórip qalyp, sálem berdik. Jumysqa kelgende aqyndy kórgenimdi aıtamyn ǵoı. Kókem oqı jóneldi. Aqynnyń balladalaryn. Jatqa biledi eken.

...«…Fashısterge talaı jerde ıt qostym,

     Qoldan kelse, qonyshtan bas, súıt, dostym.

     Qashan orys tilin bilip alǵansha,

     Ash bolǵam joq, arqasynda «Bıtqoshtyń».

     Jıren murtyn órtke talaı jandyryp,

     Talaı jerge… qasyq qanyn qaldyryp.

      Elge, sóıtip, aman qaıtty Kemelbaı,

     «Bıtqoshpenen» shólin talaı qandyryp…»....

Osy joldar bizdiń de sanada jattalyp qaldy. О́leńdi jattaýda Qaınekeńe shendeser jan az-aý. Tipti Qadyrdyń ózin tańqaldyrǵan. О́zge aqyndardy da. Maǵaýınmen bir deńgeıde sóılese alatyn adam. Maǵaýınniń óz-ózine kóńili tolmaı júrgen kezinde qanattandyryp jibergenin de estidik. Jaraıdy, ol jaǵyna barmaı-aq qoıaıyq. Biz «Habardyń» esigin ashqanda, «terezesinen» túsken aǵam «Jeti kúnge» mátin jazady eken. Qoly bostaý kezi ma eken, álde biz qasynan shyqpaı, mazasyn alamyz ba. Áńgimesin ábden tyńdaǵan kezimiz sol. Keıde oılandyrady. Keıde tolǵandyrady. Keıde kúlkige kómedi. Birde oljaly oraldy. О́zge ulttyń ókiline súıip qosylǵan bir qaryndastyń qalyń malyn túgeldep qaıtypty. Árkimniń qolyna túse bermeıtin kerim pyshaq. «Qalyńdyq aıttyryp, qalyń mal berdi deısiń be, mynaý azdap bolsyn óteýi», - deıdi. Tegin qaryndas bola ma, durys qoı.

Qanysh aǵanyń kóshesindegi álgi bir ǵımaratta ne oqıǵalar oryn aldy ǵoı. Birde Qaınekeń tilshilerge keldi. Tóbe jaqtan. Qasyna jınalamyz. Kezekti mátindi oılana jazyp, Bıbigúl otyrdy. Anaý jerden Jaına keldi. Biz de solaı buryldyq. Aǵam Álimjanmen sóılesip tur eken. Inisin shıratyp otyrady. Shabytyn shyńdaı ma, sheberligi artsyn deı me. Álde óziniń bıigine shyǵa alatyn, tereńine boılaı alatyn úmiti shyǵar... Ál-aǵam álde bir áńgimeniń tıegin aǵytypty. Poezııa ma eken, ádebıet pe? Shamalaýymsha, sol sala. Inisin ázilmen ilip sóleıtin Qaınekeń Ál-aǵamdy toqtatty da:

- О́leń quraý ońaı bolsa, qane shyǵarshy. Mynaý, Bıbigúldi qos. Aspanǵa qara, shabyt shaqyr. Aınala tunyp turǵan taqyryp qoı. Al, kórsetshi qarymyń men qabyletińdi?

- Oı, Qaıneke, óleń shyǵarý qıyn deısiz be. Taqyryp deısiz á, Bıbigúl deısiz á? Qazir, qazir... Mine,

«Aspanda bult aınalyp,

sálden soń quıdy nur. 

Al, jerde oılanyp,

otyrdy Bıbigúl. Keldi me?

- Áı, jolbarysym deýshi edi, myqty aǵalar. Jolbaryssyń! Bárekeldi, jaqsy shyqty. Mine, jigit!

 Biz de, Bıbigúl de máz bolyp qaldyq. Qaınekeń tapqyrylyqty unatady, ári baǵalaıdy. Ál-aǵamnyń qolyn aldy da, ústidegi jumys kabınetine kóterile berdi. Unatqandy moıyndaıtyny taǵy bir. Darhanǵa qol soǵyp turdy. Ábdikke. Polısııa týraly materıalyn Maılın keıipkeri arqyly túırep ótipti. Olardyń deńgeıi Qurymbaıdan aspaıtynyn meńzep. «Mine, teńeý, ári tapqyrlyq», - dep shattandy aǵam. Tyńdatady da, tyńdaıdy da. Kóbine bizdiń eldiń klassıkteri tyńdatqanǵa ǵana qumar. Tyńdaýǵa zaýqy soqpaıdy. Aǵam, aldymen tyńdaıdy. Sonysymen de iri.

Jumys kabıneti demekshi. Birde kirip barsaq, kassetalarǵa kómilip otyr. Qolynda qalam, áldebir qujattardy toltyrady. Sosyn kompıýterge úńiledi, Bizdi kórip, basyn kóterdi.

- Tórlet, Amanjan

- Ne istep otyrsyz?

- Oı, qyzyq boldy. Úsh qyzym bar ǵoı. Qujat toltyratyn. Kasseta aparatyn. Arnanyń ishki jumystaryn atqaratyn. Tańerteń bireýi surandy. Kóńilin qımaı jiberdim. Túske taman ekinshisi keldi. Shuǵyl sharýasy bar eken, qalaı ustap qalasyń?

- Endi úshinshisi qaıda?

- Qyzyǵy sol bolyp tur emes pe? Soǵan senip álgi ekeýin jibergem ǵoı. Jańa kelip tur, «aǵa sizden keshe suranyp edim ǵoı, jiberem degensiz»,- dep.

- Sodan?

- Endi jiberdim. Sózde turý kerek qoı. Sóıtip úsheýiniń jumysyn ózim istep...

Aǵam qarq-qarq kúledi. Bildeı derektirdiń úsh birdeı jumysshysyn jiberip, solardyń isin ózine artyp alǵany.. Mynadaı basshysy bar álgi qyzdar shynymen baqytty shyǵar..

Baqyt demekshi. Aǵam jylt etken jańalyqty elden buryn kóredi. Kúnderdiń birinde Aızada jumysqa alyndy. Aǵa Serik Janbolattyń túski úzilistegi kezekti shyǵarmashylyq konsertinen keıin damyldaǵan gıtarasyn ala salyp, álde bir ándi baıaý yńyldaǵan ǵoı. Qaınekem estip qalypty. «Aı astyndaǵy Aızada qyz» degen keshtiń ssenarıin taban astynda jazyp tastady.

Aǵam jaıma-shýaq. Kez kelgen sátte erkeleýge bolady. Eki ret erkelikti irke turdyq. Saıasatta demokratııa qanat jaıǵan kez boldy. Prezıdent saılaýynyń qarsańy. Debat ótetin sekildi. Úmitkerler arasynda. Odan habarymyz az. Bazar aralap júrgenbiz. Aǵanyń telefony jarq ete qaldy. Alysta bolsań da, alýyń kerek. О́ziniń bir jazǵany bar, «áriptes bolsa da balań, balań bolsa da áriptes», -deıtin. Aıbar men Aıdynnyń birin aıtady. О́zi aıtpaqshy, «Aǵa bolsa da bastyq, bastyq bolsa da aǵa».

- Allo!

- Qaıdasyń?

- Sol bazarda júrgen..

- Bazary nesi? Tez qaıt! Úlken bastyq kútip otyr.

- Aǵa, bazarda júrmin..

- Bulǵaqty qoı. Beri qaıt!

Úni jumsaq bolǵanmen, úkimi qatty. Qaıttyq. Jumysqa kelgen bette, ózi baǵyttaǵan úlken bastyqtyń qabyldaý bólmesine endik. Aǵam qarsy aldy. «Áı, ishte úlkender otyr. Durystap amandas. Sosyn sózderin bólmeı, tyńda». Jolaı estigen nusqaý osy. Ishke endik, sózderin bólmeı tyńdadyq. Asa eshteńe uqpadyq. Uqpaıtynymyz, bizge múlde qatyssyz dúnıe. Aq úıden kelgender saýal qoıǵan jaǵdaıda, bizdiń qandaı jaýap beretinimizdi qapysyz túsingen aǵam aldymdy orady. «Bar, shyq, qalǵanyn ózim túsindirem». Ile-shala qýyp jetti. Aıtyp, túsindirdi. Kóngennen keıin qaıta kirgizdi. Ol kezde mán-jaıdy da bilip, talaı dúnıeni túsinip alǵanbyz. Bas tartýǵa mursha qalmady. Qaldyrmaǵan – aǵam. Aıtty, bitti. Oryndaýymyz kerek. Ekinshisi, ózi bir kezekti keremet jobany oılap tapqannan keıin aı ótkendegi oqıǵa. Júrgizýshi kerek eken. Jalqaýlyqqa jaqyn júrgen kezimiz. Anaý beınet. Keshkimiz kelmeıdi. Aǵam ekinshi ret buıyra sóıledi. Kóńilin qaltyra almadyq. Baǵyndyq.

Birde ózine shaqyrdy. Múmkin birinshi ret. Alystan oraǵytyp, áldenelerge jeteledi. Túpki maqsat ol emes ekenin bilip otyrmyz. Ne búldirdik? Kózimiz aǵada, qulaqqa aıtqan sózi qonyp jatyr. Biraq, oıymyz on oram. Qaıda bastap barady? Neni meńzeıdi? Basymyzdyń qatyp bara jatqanyn uǵyp, aıady, bilem.

- Akademık Syzdyqovany tanısyń ǵoı?

- Álbette!

- Tanysań, sol kisiniń ótinishi. Eger óreń jetip, qabyldaı alsań, talaby...

- Aıtsańyzshy endi

- Shyq ete qalmasyn. Akademık kúnde keńes bermeıdi..

- Qaıneke-aý, endi..

- Tura tur. Aıtamyz. Aıtpaǵanda. Durys, óziń oılap taptyń. Jurt sol sózdi tosyp ta otyrady. Biraq, Rábıǵa apaı aıtady. Úndestik zańy, ol kisi biledi ǵoı. Jeńisti kúnderde jolyqqansha emes. Júzdeskenshe. Kelip tur ǵoı, áı, qarashy óziń. Jeńisti kúnderdi júzdeskenshe. Apaı aıtty, Amankeldige keńesim dep. Qandaı tamasha! Ne degen óreli, mádenıetti, ııa?

- Árıne. Túsindim. Qabyl aldym. Akademık apama myń alǵys. Búginnen bastap ózgeredi.

Aǵam qýanyp qaldy. Sózdi túsinetin neken-saıaqtar qatarynan ǵoı. Kózáınektiń ústinen mátinińe bir qarap, uǵa beredi. Ábden ysylǵan. Myqtylardy moıyndap júrip, ózin moıyndatýǵa kóshti qazir. Kez-kelgen isi úlgi. Áleýjelide dáris beredi. Qoǵammen birge, qarbalasta. Qoly qalt etkende kitap jazady. Úsh-tórt jumysty qatar atqarýǵa beıimdelgen. Birdi tyńdap, ekini jazyp, úshinshi jospardy mıda sapyrady. Kózi aıtashyda. О́zi kompıýterdiń ishinde. Bir ózi bir arnany súıregen kezi de boldy.

Aǵam qonaq shaqyrǵandy óte jaqsy kóredi. Tús kezinde jumystan qoly bostardyń birazy sońynan eremiz. Jeńgemizdiń qoly ashyq, peıili keń, dastarhany mol. Jaqsy qyz Jaına ekeýi kútip otyrady. Jaına – aǵamnyń qyzy. Erke ári aqyldy. Bárimizdiń aty-jónimizdi ári atqaratyn sharýamyzdy bilip alǵan. «Habardyń» jańalyqtaryn kóredi. Sózi de, ózi de tátti. Aǵamnyń aýzynan túsip qalǵandaı. Jaınanyń áńgimesin tyńdap, jeńgeıdiń asyn qarpyp qaıtamyz. Tosaptyń táýiri qaınatylǵan kúni de, elden sybaǵa jetken kezde de, tátti nannyń jańa bir resepti tabylǵan sátte de sol shańyraqtamyz. Top bolyp baryp, toq bolyp oralamyz. Jeńgemizdi de alǵash «Dáýirde» kórgenbiz. Býhgalterııada. Bildeı maman. Sol kisiniń aldynda quraq ushatynbyz. Redaksııa-redaksııa bolyp. Susty kórinetin. Kóp sóılemeıdi. Bizdiń býhgalter Saltanat ápshem ekeýmiz talaı meıramda quttyqtadyq qoı. Endi – jeńgeı! Qoly – dámdi! Áńgime aǵam jaıly edi ǵoı.

Bir kúnde baǵban bolyp shyǵa keldi. Burynnan qabiletti me, joq daryn túbi tanyla bere me? Aǵam bul kúnde baqshashy. Baýy jaıqalyp tur. Kóshetti jerdiń túbinen bolsa da, aldyrady. Kútip, baptaıdy. Mápelep, ósiredi. Jemisin elge usynady.Tup-týra óz tabıǵaty. Álgi materıal jınaıtyny, ony baıyptap jazatyny, keıin oqyrmanǵa usynatyny sekildi. Shyǵarmasyn bireýge oqytyp, ózi syrttan baqylaıtyny sekildi, baqshasynyń jemisin úzip berip, súısinip jeseń, tamsanyp otyrady. Qultóleý aǵamsha ketsek, «Qalaı ósirem, á!» Myqty ósirgensiz, aǵa! Aıtary joq...

Aıtarymyz kóp edi, negizi. Birde kólikpen ketip bara jatyr edik. Radıo Qaınar aǵamen suhbat usyndy. Ne degen tereń! Taǵy bir qyrynan tanylyp jatty. Bylaı deıdi: «Bizdiń sózdik qorymyz suıylyp barady. Eger ózimdi alsam, men ákem Qalıaqpardyń sózdik qorynyń qyryq paıyzyn meńgerdim. Ákem óz kezeginde ákesi Oljaıdyń sózdik qorynyń ary ketse qyryq paıyzyn ustap qaldy. Meniń balalarym she?». Mańdaıdan ter burq ete qaldy. Biz úshin Qaınar – muhıt sekildi. Sonda Qalıaqpar kim boldy? Oljaı she? Qanshalyqty azyp baramyz, sonda? Qanshalyqty kedeılendik? Qaınekeńniń shıregine jetpeımiz ǵoı. Onyń este saqtaý qabileti, estigenin jadynda saqtap qana qoımaı, qoryta alatyny. Izdenisi. Tapqyrlyǵy. Rejısser О́rken Qaınekeńe jıi telefon soǵady. Kóbi mynadaı mazmunda, «Aǵa ýaqytyńyzdy aldym ııa, biraq tappaı jatyrmyn. Bálenbaı jyl buryn, Túgilenbaı degen kisi týraly materıal ótip edi ǵoı. Esińizde me? A, ııa, ııa? Qandaı keremetsiz, Qaınar aǵa. Apta boıy izdep tappap edim. Iıa, durys aıtasyz. Endi taýyp alamyn». Qaınekeń «Habardyń» qoryn jatqa bile me? Qaı kúni nendeı materıal ótkenin de? Netken qabilet.

Birde aǵam syrqattanyp qaldy. Kádimgideı júdedi. Ony kórip bizdiń de boıymyzdy úreı bıledi. Bir kúni bylaı deıdi: «Men túsindim. О́zimdi umyta jazdappyn. Zerttedim. Sheshimin taptym. Endi ózimmen de shuǵyldanam». Ál-aǵam aıtady.

- Qaınekeń ózine qaraımyn dep edi, bildiń be ne ekenin?

- Joq?!

- Masqara, men bildim. Jattyǵý jasaıdy, janyn aıamaı. Tóselip alypty. Seniń sportshylaryń qasynda jip ese almaıdy. Mine, kórdiń ǵoı, uqypty adam ár iste de úlgi.

Aǵa, siz týraly birdeńe aıtqym kelip edi. Sizdiń álemge enemin dep, adasyp qaldym. Aıyp etpeısiz. Biz sizdi qurmet tutamyz. O bastan. Ol –anyq. Qalǵany bola jatar, ııa? Qutty bolsyn, Alpysyńyz! Jetpiske jetemin dep ANT ishińiz!

Amangeldi Seıithan