«Saryarqa» velotreginde QR BAQ arasynda belgili sport jýrnalısi, qoǵam qaıratkeri Seıdahmet Berdiqulovty eske alýǵa arnalǵan shaǵyn fýtboldan jyl saıynǵy respýblıkalyq týrnır ótti.
Bıyl týrnırge 19 komanda qatysýǵa nıet bildirdi. Olardyń qatarynda óńirlik BAQ ta bar.
Týrnırdiń jeńimpazy Syr óńirinen kelgen «Aqmeshit» komandasy, ekinshi júldeli oryndy «Elorda Aqparat» komandasy alsa, úzdik úshtikti Taldyqorǵandyq «Turan» túıindedi. Sonymen qatar týrnır aıasynda «Úzdik shabýylshy» ataǵyn Aqmeshit komandasynyń oıynshysy Ádilbek Jaqanov ıelense, Turan komandasynyń oıynshysy Azamat Imambetov «Úzdik qorǵaýshy» atandy. «Elorda Aqparat» komandasynyń oıynshysy Azamat Nurmatov «Úzdik qaqpashy» atansa, «Habar 24» telearnasynan Jasulan Qasymberkebaı týrnırdiń «Úzdik oıynshysy».
Týrnır aıasynda ótken jylǵy Seıdahmet Berdiqulov atyndaǵy respýblıkalyq «Úzdik sport jýrnalısi» baıqaýynyń 2017 jylǵy laýreattary da marapattaldy.
«Úzdik televızııalyq materıal» atalymynda Habar24 telearnasynyń jýrnalısi Larısa Grechıhına, «Úzdik baspa materıaly» atalymynda Egemen Qazaqstan gazetiniń jýrnalısti Álı Bıtóre úzdik dep tanyldy. Dál osyndaı atalymda Aıqyn gazetiniń jýrnalısi Jadyra Aqqaıyr da úzdik atandy. Komıssııanyń sheshimimen yntalandyrý syılyǵy Qazaqstan-Mańǵystaý telearnasynyń jýrnalısi Aqsyndar Tabyldyǵa buıyrdy.
Týrnırdiń basty maqsaty – «Ult saýlyǵy» baǵdarlamasy aıasynda QR BAQ arasynda fýtbol oıynyn damytý, BAQ ókilderi arqyly halyqty salaýatty ómir saltyn ustanýǵa shaqyrý.
Aıta keteıik, atalǵan týrnır 1995 jyldan beri uıymdastyrylyp keledi. Basynda S. Berdiqulov memorıalyn Qazaqstan Respýblıkasy Baılanys jáne aqparat mınıstrligi uıymdastyrdy. 2008 jyldan bastap atalǵan jarystardy Qazaqstan Respýblıkasy Týrızm jáne sport mınıstrligi ótkizip keledi. Dene shynyqtyrý jáne sport salasyndaǵy ýákiletti organ 1995 jyldan bastap BAQ-ta sport taqyrybynda mamandanǵan Qazaqstan jýrnalısteri arasynda S.Berdiqulov atyndaǵy syılyqqa respýblıkalyq konkýrs jarııalap, ótkizip júr.