Keshe Úkimet úıiniń baspasóz ortalyǵynda «Astana» halyqaralyq qarjy ortalyǵynyń basqarýshysy Qaırat Kelimbetov ortalyqtyń 5 shilde kúni ótetin resmı ashylýyna daıyndyq barysy jaıynda aıtyp berdi.
Q.Kelimbetovtyń aıtýynsha, qazirgi tańda «Astana» halyqaralyq qarjy ortalyǵyna 55 kompanııa qatysýshy retinde tirkelgen. Jyl aıaǵyna deıin 100 kompanııa tirkeledi degen jospar jasalyp otyr.
– Bıylǵy jyldyń aıaǵyna deıin 100 kompanııa tirkeledi degen jospar bar, demek jospardyń jartysy oryndaldy degen sóz. Ortalyqqa álemdik qarjy uıymdary tarapynan qyzyǵýshylyq bar,– deıdi Q.Kelimbetov.
Qarjylyq texnologııalar boıynsha tirkeýge turǵan kompanııalar da az emes. Olardyń basym kópshiligi Reseı, Taıland, Nıgerııa, Afrıka elderiniń, Shveısarııanyń ókilderi. Atalǵan kompanııalar jańa tólem quraldary, bankıng jáne taǵy basqa qyzmetter boıynsha jumys isteýge daıar ekendikterin bildirip otyr.
Budan bólek, qarjy ortalyǵynyń bırjasyna kelgen brokerlik kompanııalardyń da qatary kóbeıip keledi. AHQO Bırja basqarma tóraǵasynyń orynbasary Ámına Turǵylovanyń sózine qaraǵanda, osy aptada birqatar brokerlik kompanııalarǵa arnaıy kýálikter tapsyrylady. Sheteldik kompanııalar tarapynan AHQO-ǵa degen qyzyǵýshylyq asa joǵary. Ásirese Qytaıdyń qundy qaǵazdar jónindegi kompanııalary belsendilik tanytýda. Baǵaly qaǵazdardy basqarý boıynsha Qytaıdyń mańdaıaldy 5 banki, odan bólek iri-iri 5 kompanııasy qatysýǵa nıet bildirgen. Álemdik eń iri qarjy ınstıtýttarynyń biri – Qytaı memlekettik damý banki ortalyqta ókildik ofısin ashyp, aldaǵy ýaqytta birlese jumys atqarýǵa bilek sybana kirisip otyr.
– Burynǵy Keńes quramyndaǵy elderdiń arasynda tuńǵysh ret aǵylshyn quqyǵynyń qaǵıdattary engizilip, qarjy ortalyǵynyń resmı tili aǵylshyn tili bolyp belgilendi. AHQO-nyń negizgi mindetteri qarjylyq qyzmet salasynda ınvestısııalaý úshin tartymdy orta qurý arqyly el ekonomıkasyna tikeleı shetel ınvestısııalaryn tarta otyryp, Qazaqstan Respýblıkasynyń baǵaly qaǵazdar naryǵyn damytý. Onyń halyqaralyq kapıtal naryqtarymen yqpaldasýyn qamtamasyz etý negizgi mindetterimizdiń biri. Bizdiń elimiz jahandyq ekonomıkanyń bir bólshegine aınalyp, halyqaralyq ekonomıkalyq zańdylyqtar boıynsha jumys atqaryp otyr. Ekonomıkany ártaraptandyrý boıynsha Elbasynyń bastamasymen júzege asqan ındýstrııalyq-ınnovasııalyq damý jáne «Nurly jol» baǵdarlamalary tyń serpin ákelgeni anyq, – dedi Q.Kelimbetov.
«Astana» HQO basqarýshysy atap ótkendeı, ortalyq búginde álemniń kóptegen memleketteri qoldaý bildirgen «Bir beldeý, bir jol» halyqaralyq baǵdarlamasyna qarjylyq qyzmet kórsetetin ortalyqqa aınalý múmkindigine ıe bolyp otyr.
Erkejan AITQAZY, «Egemen Qazaqstan»