Osydan jeti jyl buryn ólketanýshylarmen birge Torǵaı dalasyna jasalǵan tarıhı-tanymdyq ekspedısııa quramynda bolǵanymyzda, Ahmet Baıtursynovtyń kindik qany tamǵan Aqkól tóńiregindegi kól attas aýylǵa da jolymyz túsken. Aýzyn ashsa, júregi kórinetin aýyl adamdary ekspedısııany kútip alyp, sol ólkeniń tarıhy týraly áńgime tıegin aǵytqan edi. Sol joly Yzban aýyldyq okrýginde bas maman bolyp qyzmet isteıtin Rabıǵa Jaqypbekova apamyz aýyl mektebindegi mýzeı buryshynan aýzyn kere ashqan, tisteri qasqyrdyń tisindeı aqsıyp turǵan shortannyń basyn kórsetken edi. Biz sol sátti fotoapparat obektıvine basa qoıyppyz.
– Ahańnyń Aqkólinen osydan 3-4 jyl buryn aýyldaǵy Amandyq Oljabaev degen jigittiń aýyna túsken shortannyń salmaǵy 17 kılogramm tartty. Aýyldastardyń bárine dám aýyz tııýge jetken bolatyn. Balyqtyń basyn mektep mýzeıine sol jigittiń ózi ákelip berdi, – degen edi apaı. Shortan balyq Qostanaı-Torǵaıdyń ózge de ózen-kólderinde de kezdesedi. Biraq shortan bitkenniń turqy kisi boıyndaı, salmaǵy osynsha tarta bermeıtini ras. Balyǵy shorshyp jatatyn Aqkóldiń bir baılyǵy, qasıeti bolar dep oılaǵanbyz.
Biraq sońǵy jyldary Aqkólge Jylanshyq ózeni quıýdy qoıǵan bolatyn. On shaqty jyl sý jetpegen soń, kóldiń tabany qurǵap, balyqtyń qyrylǵan kezi de boldy. Biraq tabıǵattyń bizben bólise bermeıtin qupııasy mol-aý. Bıyl qys jumsaq bolyp, qar az tússe de, Aqkól sýǵa tolyp, kemerinen asypty. Tek Aqkól mańy ǵana emes, jalpy Torǵaı dalasyna sý jaıyldy. Aqkóldikterdiń de, Torǵaı óńirindegilerdiń qýanyshynda shek joq. Aqkól, sol baıaǵy bala Ahmet jaǵalaýynda júgirgen Aqkól túk bolmaǵandaı tolqyp jatyr. Aýyl adamdary bul kúnde qaıtadan qarmaǵyn daıyndap, aý toqýǵa kirisken. Amandyqtyń aýyna túsken shortan mýzeıde ǵana tura ma degen aýyldastardyń ýaıymy seıilgendeı.
Názıra JÁRIMBET, «Egemen Qazaqstan»
Qostanaı oblysy, Jankeldın aýdany