Erlan Saǵadıev Sáýle Aıtpaevany ÚEU ókilderimen tanystyrdy

Basqosýdyń maqsaty – aza­mat­tyq sektorlarmen ózara is-qı­myldyń jańa tetikterin qaras­tyrý men balalardyń ómir súrý sapasyn áleýmettik jáne quqyqtyq kepildiktermen qamtamasyz etý úshin tıimdi sharalardy qabyldaý.

Azamattyq sektor óz kezeginde  balalardyń quqyqtary men múd­delerin qorǵaýdy júzege asyra­tyn máselelerde qoǵamdyq baqy­laýshynyń mindetin atqaratyny aıan. Sondyqtan kezdesýge kelgen qoǵam belsendileri memlekettik organdarmen birlese otyryp, res­pýblıkada balalyqty qorǵaýdyń tıimdi júıesin qalyptastyrý má­selelerinde birlesken qyzmet nysandary men dıalog qurýǵa umtylatyny belgili. 

Onyń ústine sońǵy jyldary bala Ombýdsmenine artylǵan jaýap­kershilik burynǵydan da kúsheıdi. Qazirgi tańda balaǵa qa­tysty qylmystardyń órshýi Ombýdsmen qyzmetiniń ózekti bola túsetinin kórsetýde. Balany  dáret­hanaǵa laqtyrý, zorlaý, óltirý, satý, eńbegin qanaý, erte júktilik, sýısıd syndy máseleler legi qoǵamnyń alańdaýshylyǵyn týdyryp otyr. 

Bala quqyqtary jónindegi ýákil bul óreskel jaıttardyń birin de aınalyp ótpeıdi. Biraq Ombýdsmenge jınalǵandar tarapynan kóbinese elektrondyq kúndelikterge qatysty saýaldar qoıyldy. Qoǵamdyq uıymdardyń oıynsha, elektrondyq kúndelikti endirý saldarynan ata-analar mektepke barýdy qoıǵan. Alaıda bul máselege qatysty Bilim jáne ǵylym mınıstri Erlan Saǵadıev óz ýájin aıtyp, kerisinshe sońǵy jyldary ata-analar jınalysyna qatysatyndar sany 1,5 ese ósti degen derekti alǵa tartty. 

Kezdesýde «Meıirimdilik» erikti qoǵamy» qoǵamdyq qory­nyń jetekshisi Arýjan Saın aı­maqtardaǵy máselelerdi alǵa tartty. Onyń oıynsha, jergilikti atqarýshy organdar turǵyndardyń máselelerine júrdim-bardym qaraıdy. Sol sııaqty Arýjan Saın Ombýdsmenniń óz shtaty bo­lýy kerek deıdi. «Bir ǵana Om­býdsmen barlyq jaǵdaıdy ıgere almaıdy. Instıtýt ta óz­ger­di já­ne zańdardy da qaıta qaraý qajet. Qoǵamdyq uıymdarǵa da ıek artýǵa bolady», deıdi A.Saın. 

О́z kezeginde Sáýle Aıtpaeva toqsanyna bir ret jergilikti atqarýshy organdardy qatystyra otyryp, beınekonferensııalar uıymdastyrý qajettigin atady. 

– Qazirgi tańda azamattar bir­den ortalyq atqarýshy organdarǵa nemese Bala quqyqtary jónindegi ýákilge júginedi. Sondyqtan Bala quqyqtary jónindegi ýákil Bilim jáne ǵylym mınıstrligi alańynda, Densaýlyq saqtaý mınıstrliginde ÚEU-larmen birge jergilikti atqarýshy mekemelermen qosylyp beınekon­ferensııa-baılanys arqyly aza­mattardy qabyldaıdy. Osy­ǵan qarap, biz qalaı jumys isteı­tinimizdi anyqtaımyz. Adam­dar qolymyzdaǵy qazirgi bar­lyq múmkindiktermen olarǵa qam­qor­lyq jasaıtynymyzdy sezinýi qajet. Kúzge qaraı alǵashqy qabyldaýdy júrgizemiz dep oılaımyn, dedi Ombýdsmen.

Kezdesý qorytyndysy boıynsha, áleýmettik jetimdikke jáne kámeletke tolmaǵandarǵa qatysty zorlyq-zombylyqtyń aldyn alý máseleleriniń naqty qadamdary, ómirlik qıyn jaǵdaıǵa tap bolǵan balalarǵa kómek kórsetý jáne jedel áreket etý joldary ázirlenetin bolady.

Aınash ESALI, «Egemen Qazaqstan»

ALMATY