Jetpiske jýyq balaǵa plastıkalyq ota jasady

Sondaı-aq «Balalar – bizdiń bolashaǵymyz» áleýmettik jobasy aıasynda mıkrotııa jáne estý arnasynyń atrezııa dıag­nozy qoıylǵan keńeske balalar qatysty. 

Bıyl maýsym aıynda amerıkalyq hırýrgter 140-qa jýyq pasıentti qarap, 64 balaǵa ota jasaýǵa sheshim qabyldady. Sonyń ishinde mıkrotııa men estý arnasynyń atrezııasy bar 7 balaǵa ota jasaldy. Bul balalarǵa amerıkalyq hırýrg zamanaýı «Medpore» ımplantyn qoldanyp, qulaq qalqanyna rekonstrýktıvti operasııalar júrgizdi. Bul otalar Qazaqstanda alǵash ret jasaldy jáne amerıkalyq mamandardyń sheberlik-sabaǵyna Almatydan arnaıy kelgen dárigerler de qatysty. Atalǵan jobany «Asyl bala» qoǵamdyq qory AQSh-tyń «Halyqaralyq yqpaldastyq tobyndaǵy» áriptesterimen birlesip «University Medical Center» korporatıvtik qorynyń Ana men bala ulttyq ǵylymı ortalyǵy bazasynda iske asyrdy. Plastıkalyq operasııalar jasaý úshin atalǵan qoǵamdyq qor 1 795 340 teńge somasyna dári-dármek satyp aldy. Sondaı-aq 160 650 teńge mólsherinde mıkrotııa jáne estý arnasynyń atrezııasy boıynsha operasııalardy júrgizýge qajetti drenajdar satyp aldy. 

Jobanyń negizgi maqsaty – mamandardyń ózara tájirıbe almasýy, otandyq hırýrgterdiń biliktiligin arttyrý jáne qazaqstandyq balalar arasynda múgedektikti azaıtý baǵytynda ári qaraı ózara yntymaqtastyq ornatý. Eske sala keteıik, 2016 jylǵy 4 qazanda jobanyń alǵashqy kezeńi bastalyp, 2017 jyldyń 13-15 naýryzy aralyǵynda «UMC» korporatıvtik qorynyń Ana men bala ulttyq ǵylymı ortalyǵy jáne Surgicorps International (AQSh) plastıkalyq hırýrgteri osy ortalyq bazasynda elimizdiń barlyq óńirinen kelgen 300-den astam balany, onyń ishinde balalar úıleriniń 14 tárbıelenýshisin qabyldap, tekserýden ótkizgen bolatyn. Al úshinshi kezeńde, 2017 jyldyń mamyr aıynda 80 balaǵa ota jasaldy.     

«Egemen-aqparat»