Turgay Discovery ǵylymı-zertteý jobasy boıynsha uıymdstyrylǵan ekspedısııa músheleri Taran aýdanyndaǵy Áıet ózeniniń jaǵasynan qyzyq oljaǵa tap boldy. Oblystyq tarıhı-ólketaný mýzeıiniń ǵylymı qyzmetkerleri jyl saıyn bul óńirden paleontologııalyq qaldyqtardy izdestiredi, zertteý jumystaryn júrgizedi.
Bıyl zertteýshiler tasqa aınalǵan teńiz mollıýskalary men dınozavrlarynyń taǵy bir túrin – ejelgi teleozavrlar qańqasyn tapty. Telozavrlardyń uzyndyǵy 3 metrden aspaıdy, al olardyń zamandasy plezıozavrlar 20 metrge deıin barǵan. Oljany ekspedısııa múshesi bıolog Andreı Andrıýshenko tanyp tapqan.
«Kóktemde Áıet ózeniniń jaǵalaýyn sý shaıyp, jardy qulatqanda ejelgi janýarlardyń tasqa aınalǵan qańqalary jaǵaǵa shyǵyp qalady. Biz osyndaı oljaǵa kezdestik. Negizi 200-145 mıllıon jyldar burynǵy Iýra kezeńine jatatyn teleozavrlar qańqasy kóbine Eýropadan, anyǵyraq aıtqanda Fransııadan tabylǵan. Bizdiń tapqanymyz Bor dáýirine (145-66 mıllıon jyldar buryn) jatatyn tunbalarda qalǵan bolýy kerek. Teleozavr latyn tilinen aýdarǵanda «naǵyz kesirtke» degendi bildiredi» deıdi bıolog Andreı Andrıýshenko.
Mýzeıdiń ǵylymı qyzmetkerleri Áıet ózeni jaǵasynan munan buryn da tasqa aınalǵan paleontologııalyq qaldyqtardy taýyp júr. Bul kesirtkeler nemese qoltyraýyndardyń ejelgi týysyna birinshi ret kezdesýi bolyp otyr.
Názıra Járimbet,
«Egemen Qazaqstan»
Qostanaı