Úkimet otyrysynda Premer-mınıstr Oljas Bektenov Almaty qalasyndaǵy JEO-2 jáne JEO-3 nysandaryn jańǵyrtý barysyn talqylap, jumystyń qarqyny tómendemeý kerektigin qatań eskertti. Sonymen qatar, jobalardyń belgilengen merzimde aıaqtalýyn qamtamasyz etý tapsyryldy, dep habarlaıdy Egemen.kz.
Premer-mınıstrge kelip túsken aqparatqa sáıkes, Almatydaǵy JEO-2 jáne JEO-3 boıynsha jumystardyń qarqyny báseńdegeni týraly málimetter bar. Osyǵan baılanysty Úkimet basshysy naqty suraq qoıdy.
«Almatydaǵy JEO-2 jáne JEO-3 boıynsha qandaı jumystar júrgizilip jatyr? Maǵan jumys qarqyny tómendep ketti degen aqparat tústi», dedi Oljas Bektenov.
Jobany júzege asyrýǵa jaýapty Samuryq-Energo basqarma tóraǵasy Qaırat Maqsutov jumystardyń Úkimet baqylaýynda ekenin atap ótti.
Onyń aıtýynsha, merdiger uıymǵa qurylys qarqynyn arttyrý jáne jumys kestesin kúsheıtý tapsyrylǵan. Nysandarda úsh aýysymdy jumys rejımi engizilip, 1,5 myńnan astam jumysshy tartylǵan. Sondaı-aq, jobalarǵa qajetti negizgi jabdyqtar jetkizilgen.
Almaty jylý elektr ortalyqtarynyń tolyǵymen gazǵa kóshiriletin ýaqyty belgili boldy
Úkimet basshysy jobanyń mańyzdylyǵyn erekshe atap ótip, ár kezeńniń sapaly jáne ýaqtyly oryndalýyn talap etti.
«Roman Vasılevıch, is basyna baryp tekserińiz, sosyn nátıjesin baıandańyz. Obektıvti aqparat kerek», dep tapsyrdy Oljas Bektenov.
Jıyn barysynda jumystyń aıaqtalý merziminiń buzylýyna jol bermeý basty basymdyq retinde belgilendi. Úkimet energetıkalyq ınfraqurylymdy jańǵyrtý jobalarynyń strategııalyq mańyzyn eskere otyryp, barlyq jumystardyń qatań baqylaýda bolatynyn jetkizdi.
Osylaısha, Almatydaǵy jylý elektr ortalyqtaryn jańǵyrtý boıynsha jumystar Úkimettiń turaqty nazarynda qalyp otyr, al jaýapty organdarǵa jobany ýaqytynda ári sapaly aıaqtaý mindeti júkteldi.
Shyǵysta jylý júıesine kún energııasy tehnologııalary engizilip jatyr