«QazTransOıl» AQ magıstraldy sý taratqyshy Qulsary qalasynda sý berý mólsherin táýligine 9400-den 12000 kýbmetrge deıin kóterdi, dep habarlaıdy Jylyoı aýdany ákiminiń baspasóz qyzmeti.
Jylyoı aýdanynda uzaq jyldan beri jazǵy maýsymda kóp qabatty turǵyn úılerdi aýyz sýmen qamtý ózekti problema bolyp kelgen edi.
Aýdan ákimdigi men «QazTransOıl» AQ ókilderinen quralǵan ekijaqty komıssııa otyrysynyń qortyndysy boıynsha magıstraldy sý taratqyshtan táýligine beriletin sý mólsherin 9400-den 12000 kýbmetrge deıin kóterý týraly sheshim qabyldandy.
- Oblys basshylyǵynyń «QazTransOıl» AQ-men kelisimine sáıkes, ekijaqty komıssııa quryldy. Komıssııa músheleri Qulsaryda beriletin sý mólsherin kóbeıtýge sheshim qabyldady, -deıdi Jylyoı aýdany ákimi Azamat Beket. -Jaz mezgilinde kúnniń ystyǵy kesirinen ásirese kóp qabatty turǵyn úılerdiń joǵarǵy qabatynda turatyndar sý problemasyna baılanysty qıyndyq kóretin edi. Beriletin sý kóleminiń kóbeıýi arqasynda problema sheshildi.