Qazaqstannyń halyq ártisi, «Otan» ordeniniń ıegeri Zámzágúl Sháripova ómirden ozdy, dep habarlady Mádenıet jáne sport mınıstrliginiń baspasóz qyzmeti.
Zámzágúl Sháripova 1931 jyly Almaty oblysy Jambyl aýdany HH partsezd aýylynda dúnıege kelgen. 1947 jyly Almatynyń Joǵarǵy kınoakterler mektebin bitirip, «Qazaqfılm» kınostýdııasynda jáne Qazaq radıosynda qyzmet etken. 1953 jyly M.Áýezov teatrynyń akterlik quramyna qabyldanyp, sol ýaqyttan beri úzilissiz osy teatrda qyzmet etip, akterlik dıapazony keń aktrısa ulttyq dramatýrgııa ben dúnıejúzilik klassıkadan san qyrly 100-den asa beıne somdaǵan.
Zámzágúl Núsipbaıqyzy ulttyq klassıka men zamanaýı dramatýrgııada - M.Áýezovtiń «Aıman-Sholpanynda» Aıman, «Qaragózinde» Qaragóz, Ǵ.Músirepovtiń «Aqyn tragedııasynda» Aqtoqty, Q.Muhamedjanovtyń «Jat elde» dramasynda Eva Braýn, Á. Tájibaevtyń «Kóńildesterinde» Dámesh, Q. Baıseıitov pen Q. Shańǵytbaevtyń «Beý, qyzdar-aı!», «Oı, jigitter-aı!» komedııalarynda Nursulý, S. Júnisovtiń «Ajar men Ajalynda» Ajar, D. Isabekovtiń «Ápkesinde» Qamajaı, A.Bekbosynnyń «Sońǵy seziminde» Ana, F. Býlıakovtyń «Otyz ulyń bolǵansha...» komedııasynda Sálımanyń rólderin oınaǵan. Álemdik klassıka men zamanaýı dramatýrgııada - Shekspırdiń «Otellosynda» Dezdemona, «Rıchard Sh»-de Koroleva, Gorkııdiń «Kúnnen týǵandarynda» Elena, V. Delmardyń «О́kinishti ómirinde» Anıta, L. Zorınniń «Varshava áýenderinde» Gelena, M. Meterlınktiń «Soqyrlarynda» Soqyr áıel, taǵy da basqa kóptegen rólderdi oryndaǵan. Zámzágúl Sháripova jasaǵan san qıly sahnalyq beınelerdiń ishinde erekshe tulǵalanǵany
M.Áýezovtiń «Qaragóz» tragedııasyndaǵy Qaragóz beınesi. Bul beıne aktrısa shyǵarmashylyǵynyń eń jarqyn kezeńi bolyp, onyń talantynyń lırıka-dramalyq qyryn meılinshe ashty. Tragedııalyq aktrısa retinde de múmkindigi mol ekenin tanytqan rólderiniń ishinde erekshesi S.Júnisovtiń «Ajar men Ajalyndaǵy» Ajar boldy. Qazaq óneriniń úlken tulǵasy Zámzágúl Núsipbaıqyzy - kórkemsóz oqýdyń úlken sheberi. Ol ulttyq klassıkadan radıo men teledıdarda kóptegen shyǵarma jazdyrdy. Mysaly, S.Seıfýllınniń «Aqqý áni», M.Áýezovtiń «Abaı joly» romanynan úzindiler Qazaq radıosynyń altyn qoryna endi. Al onyń «Aqqýdyń aıyrylýy» monospektaklin osy janrdaǵy erekshe tabysy deýge bolady. Aktrısanyń balalarǵa bazarlyǵy - keshki ertegileri Qazaq radıosynyń altyn qorynda jazýly. Z.Sháripova kınoaktrısa retinde de tanymal. Ol rejısser Sh.Aımanovtyń «Dala qyzynda» Nurjamal, «Biz osynda turamyzynda» Dına, rejısser Q.Ábýseıitovtiń «О́mir jolynda» Hadısha, B. Sháriptiń «Zamanaı men Amanaıynda» Ana, taǵy da basqa birtalaı kınofılmge, sondaı-aq rejısser Á. Mámbetovtiń «Abaı» telefılmine túsken.
Ulttyq ónerge sińirgen erekshe eńbegi úshin Z.Sháripovaǵa Qazaq KSR eńbek sińirgen ártisi (1959), Qazaq KSR halyq ártisi (1966) qurmetti ataqtary berildi. «Qurmet belgisi» (1959), «Halyqtar dostyǵy» (1981) jáne táýelsiz Qazaqstannyń «Otan» (2005) ordenderimen, sondaı-aq birneshe dúrkin Qazaq KSR Joǵarǵy Keńesiniń Qurmet gramotasymen marapattalǵan.
Marqummen qoshtasý rásimi shildeniń 16-sy kúni saǵat 10:00-de Muhtar Áýezov atyndaǵy Qazaq memlekettik akademııalyq drama teatrynda ótedi.