Taldyqorǵan qalasynda Qazaqstan Respýblıkasy Prezıdenti janyndaǵy Memlekettik basqarý akademııasynyń Almaty oblysy boıynsha fılıaly ashyldy. Memlekettik qyzmetshilerdiń kásibı bilimin jetildirý baǵytynda jumys isteıtin akademııa fılıalynyń ashylýyna Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev arnaıy keldi.
Fılıal ǵımaratynyń ashylý saltanatynda agenttik tóraǵasy Alık Shpekbaev pen Almaty oblysynyń ákimi Amandyq Batalov ǵımarat aldyna qoıylǵan eskertkish taqtaǵa qoltańbalaryn qaldyrdy. Mundaǵy oqytý kabınetterin, kitaphana men basqa da jumys bólmelerin aralap, olardyń jabdyqtalýymen tanysqan A.Shpekbaev akademııanyń Almaty oblystyq fılıalyn respýblıkadaǵy úzdik fılıal retinde atap ótti.
– Memlekettiń qoldaýymen oblys ortalyǵynda ashylyp otyrǵan akademııa fılıaly – óńirdiń memlekettik qyzmetshileri úshin tamasha múmkindik. Aldaǵy ýaqytta munda bilimi men kásibı biliktiligin jetildirgen memlekettik qyzmetshiler oblys ekonomıkasyn odan ári damytýǵa septigin tıgizetinine senimdimin, – dedi jıynda sóz alǵan aımaq basshysy A.Batalov.
Al A.Shpekbaev óz sózinde Prezıdenttiń tapsyrmasyna sáıkes memlekettik qyzmet isteri salasyndaǵy qolǵa alynyp jatqan zamanaýı baǵyttar týraly baıandady. Sonyń ishinde sybaılas jemqorlyqtyń aldyn alý jáne onymen kúres jumystarynyń nátıjeleri, halyq aldyndaǵy eseptilik, memlekettik qyzmet kórsetýdi avtomattandyrý, jalpy salany sıfrlandyrý týraly máselelerge keńinen toqtaldy. Ásirese eń aldymen memlekettik qyzmetshilerdiń ózi elektrondy úkimet portaly arqyly jumys istep úırenýi kerektigin atap aıtty.
– Sıfrlandyrý isine eń aldymen jergilikti jerlerde ákimder múddeli bolýy kerek. Bul oraıda Almaty oblysynyń ákimdigi úlken qoldaý kórsetip otyr. Sońǵy ýaqytta Almaty oblysynda elektrondy formatta memlekettik qyzmet kórsetý kórsetkishi artyp keledi, – dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy.
Sondaı-aq osy kúni oblys ortalyǵynda «Memlekettik qyzmetti kásibılendirýdiń zamanaýı trendteri: óńirlik aspekt» atty semınar-keńes ótti. Semınardy Prezıdent janyndaǵy Memlekettik basqarý akademııasynyń rektory Fatıma Jaqypova júrgizdi. Jıynǵa respýblıkamyzdyń ózge oblystaryndaǵy akademııa fılıaldarynyń dırektorlary arnaıy shaqyryldy.
Semınardan keıin Alık Shpekbaev Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń ǵımaratyn aralap kórip, departament ujymymen kezdesti.
Qalmahanbet MUQAMETQALI,
«Egemen Qazaqstan»
Almaty oblysy