Mańǵystaý oblysynda qolǵa alynǵan «Nur-Kapıtal» baǵdarlamasy kópshiliktiń qyzyǵýshylyǵyn týdyrǵan bolatyn. Bir paıyzdyq nesıege qol jetkizýden úmittengender sany kóp boldy, olar usynǵan jobalar da áralýan.
Jýyrda Aqtaý qalasynda atalmysh baǵdalama boıynsha alǵashqy nesıe óz ıesin tapty. Bul jańalyq oblys ortalyǵynda ForteBank fılıalynyń saltanatty ashylý rásimimen tuspa-tus keldi.
Saltanatty ashylý rásimi aıasynda ForteBank pen Mańǵystaý oblysynyń ákimdigi arasynda óńirdiń damýyna yqpal jasaıtyn jobalardy iske asyrý, sondaı-aq halyqqa sapaly bank qyzmetterin kórsetý maqsatyndaǵy yntymaqtastyq týraly memorandýmǵa qol qoıyldy.
– Qarjy ınstıtýttarynyń arasynda ForteBank aıryqsha oryn alyp otyr jáne eldegi eń ótimdi ári turaqty bankterdiń biri bolyp tabylady. Biz ForteBank pen Mańǵystaý oblysy ákimdiginiń óńirdiń odan ári damýy boıynsha ortaq josparlarynyń bar ekendigine jáne tyǵyz yntymaqtastyqta jumys isteıtinimizge qýanyshtymyz, muny ekeýara qol qoıylǵan memorandým kýálandyryp otyr. Sondaı-aq «Nur-Kapıtal» baǵdarlamasy boıynsha ortaq jobamyz iske asýda, – dedi E.Toǵjanov.
ForteBank basqarmasynyń tóraǵasy Gýram Andronıkashvılı bolsa «ForteBank qarjylandyrǵan «Nur-Kapıtal» baǵdarlamasy boıynsha sýbsıdııalaýdyń birinshi shartyna qol qoıý jańa ofıstiń ashylýyndaǵy eń basty sátterdiń birine aınaldy. ForteBank eldiń eń turaqty, ótimdi jáne jaqsy kapıtaldandyrylǵan bankteriniń biri bolyp tabylady» deı kele, bankke 2 000 000 astam klıent tirkelgendigin, banktiń19 fılıaly men 100-ge jýyq bólimshesiniń bar ekendigin atalmysh bank jumysynyń nátıjeliligimen baılanystyra jetkizdi. Aıtýynsha, bank óńirde halyqqa jáne kompanııalarǵa qyzmetter kórsetý boıynsha kóshbasshy orynǵa ıe. Mańǵystaý oblysynda ForteBank fılıaly klıentteriniń sany 34 000 astam jeke klıentter jáne 3000-ǵa jýyq kásipkerlerdi quraıdy. Sondaı-aq ForteBank «Bıznestiń jol kartasy-2020» baǵdarlamasynyń belsendi qatysýshysy bolyp tabylady, al Mańǵystaý oblysyndaǵy fılıal birneshe ret bólingen qarajattardy ıgerý qarqyny boıynsha kóshbasshy boldy. 2017 jyldyń qorytyndysy boıynsha bank 2,5 mlrd teńgege 28 jobany qarjylandyrdy.
Saltanatty rásimde «Nur-Kapıtal» óńirlik baǵdarlamasy boıynsha alǵashqy bolyp 1 paıyzben nesıe alǵan kásipker Ashatjan Ibraev atalmysh baǵdarlama jergilikti kásipkerlerge úlken demeý bolatynyn aıtady.
– Biz Qazaqstandaǵy túıe sútiniń naryǵyn taldadyq jáne úlken mólsherde eshkimniń túıe sútin alyp óndirmeıtini týraly qorytyndyǵa keldik. Bizdiń zaýyt Túpqaraǵan aýdany Saıyn Shapaǵatov aýylynda ornalasqan, biz pasterlengen túıe súti, ıogýrt, irimshik, shubat, aıran, qaımaq, shalap, tátti jáne basqa da qyshqyl sút ónimderin shyǵaramyz. «AsiaMilk» zaýyty túıe sútin qaıta óńdeý úshin 7 jyl merzimge 1%-pen 30 mln teńge nesıe aldy. Túıe sútin zaýyt konteınerinde shetelge eksporttaýǵa múmkindik týyp otyr, – dedi kásipker.
Bir paıyzdyq nesıege úmit artqandar alǵashqy úmitkerdiń anyqtalyp, óz isin bastaǵanyna qýanyp, óz kezekterin asyǵa kútýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy