Esik qalasynda №1 perınataldyq ortalyq paıdalanýǵa berildi. Jalpy aýmaǵy 10 myń sharshy metrdi quraıtyn úsh qabatty medısınalyq ǵımarat 2007 jyly salynǵan. О́tken jyly nysanǵa kúrdeli jóndeý jumysy júrgizilip, ǵımarattyń materıaldyq-tehnıkalyq bazasy tolyq jańartylyp, aınalasy abattandyryldy.
Ortalyqta zamanaýı operasııa zaldary, ortalyqtandyrylǵan ottegimen qamtamasyz etý júıesi, pasıentterdi tasymaldaýǵa arnalǵan júk lıftteri iske qosyldy. Tolyqqandy perınataldyq blok, jańa týǵan nárestelerge arnalǵan qarqyndy terapııa, jansaqtaý bólimsheleri jumys isteıdi. Dene salmaǵy tómen balalardy kútýge barlyq jaǵdaı jasalǵan. Bul – halyqaralyq standartqa sáıkes kórsetiletin sapaly ári qaýipsiz medısınalyq kómektiń kepili.
–Almaty oblysy bólingennen keıin perınataldyq ortalyq qyzmetin Qarasaı, Eńbekshiqazaq kópbeıindi ortalyq aýdandyq aýrýhanalary, sondaı-aq Almaty kópsalaly klınıkalyq aýrýhanasy atqaryp kelgen edi. Medısınalyq uıymdar aýyr jaǵdaıdaǵy pasıentterge, oblystyń túkpir-túkpirinen jetkizilgen shala týǵan nárestelerge kómek kórsetý mindetin joǵary jaýapkershilikpen oryndady. Osyndaı kúrdeli kezeńde aıanbaı eńbek etken barlyq medısına qyzmetkerlerine alǵys bildiremin. Búginde Almaty oblysy demografııalyq ósim kórsetkishi jóninen jetekshi orynǵa ıe. О́ńirimizde jyl saıyn 30 myńǵa jýyq sábı dúnıege keledi. Bul oraıda medısına salasy qyzmetkerleriniń eńbekteri eren. Sizderdiń kásibı biliktilikterińizdiń arqasynda myńdaǵan ana aman-esen sábıin baýyryna alyp, shańyraǵyn shattyqqa keneltti, – degen óńir basshysy Marat Sultanǵazıev jańa bosanǵan analar men aq jeleńdi abzal jandardy Halyqaralyq áıelder merekesimen quttyqtap, arnaıy syılyqtar tabys etti. О́ńirdegi alǵashqy perınataldyq ortalyqtyń ashylý saltanatyna qatysqan Densaýlyq saqtaý vıse-mınıstri Tımýr Muratov, «Altyn alqa» ıegeri Lıza Baıramova aqjarma tilekterin bildirse, eńbek ardageri Tileýles Uzaqov aq batasyn berdi.
Perınataldyq ortalyqta konsýltatıvtik-dıagnostıkalyq, bosandyrý qyzmeti men neonatologııalyq kómek kórsetiledi. Stasıonarda 110 tósektik oryn bar. Ortalyqta 45 dáriger, 140-qa jýyq orta býyn medısına qyzmetkeri men 87 kishi meıirbıke, jalpy sany 286 adam eńbek etedi.
– Perınataldyq ortalyq Eńbekshiqazaq aýdanymen qatar Raıymbek, Kegen, Uıǵyr, Talǵar aýdandarynyń júkti áıelderine de qyzmet kórsetedi. Munda densaýlyq jaǵdaıy úshinshi deńgeıdegi, sondaı-aq ekstragenıtaldy aýrýlary bar naýqastar men shala týǵan náresteler em alady. Búginde 63 áıel ornalasqan. Jansaqtaý bólimindegi 26 sábıdiń 8-iniń salmaǵy 1 kelige jetpeı shala týǵandar. Kúnine shamamen 10–15 áıel bosanady, – deıdi ortalyq dırektory Dáýren Imanálıev.
Almaty oblysy,
Eńbekshiqazaq aýdany