Búginde Qazaqstanda 70-ten astam teatr jumys isteıdi, onyń 59-y – memlekettik teatrlar. Olardyń qatarynda 11 respýblıkalyq jáne 48 óńirlik teatr bar. Bul kórsetkish teatr óneriniń órkendep, sahna mádenıetine degen jurtshylyq qyzyǵýshylyǵynyń arta túskenin kórsetedi, dep habarlaıdy Egemen.kz
Memleket basshysy atap ótkendeı, teatrdyń damýy – el mádenıetiniń deńgeıin aıqyndaıtyn mańyzdy kórsetkishterdiń biri. Qazaqstanda da teatr ónerine degen qyzyǵýshylyq turaqty saqtalyp keledi. Muny kórermender qatarynyń artýy men jańa qoıylymdarǵa degen suranystyń joǵary bolýy aıqyn ańǵartady.
Saladaǵy oń serpin 2025 jyldyń qorytyndysynan da baıqalady. Byltyr memlekettik teatrlarda 410 jańa qoıylym kórermenge jol tartyp, 539 gastrol uıymdastyryldy. Onyń 495-i el óńirlerinde, al 44-i shetelde ótti. Bir jyl ishinde 16 myńǵa jýyq spektakl sahnalanyp, olardy 2 832 835 kórermen tamashalady.
Otandyq teatrlardyń halyqaralyq festıvalder men baıqaýlarǵa belsendi qatysýy da salanyń qarqyndy damyp kele jatqanyn kórsetedi. 2025 jyly qazaqstandyq teatr qaıratkerleri 101 halyqaralyq jáne 90 respýblıkalyq festıval men baıqaýda óz ónerin pash etti. Nátıjesinde qazaqstandyq teatrlardyń 13 qoıylymy «Gran-prı» jáne «Úzdik spektakl» atalymdary boıynsha joǵary marapattarǵa ıe boldy.
Bıyl da saladaǵy oń úrdis jalǵasyn taýyp otyr. Jyl basynan beri memlekettik teatrlarǵa 611 685 kórermen bardy. Osy ýaqyt ishinde 197 jańa spektakl sahnalandy. Onyń 146-sy otandyq avtorlardyń shyǵarmalary negizinde usynylyp, 47-si sheteldik dramatýrgterdiń týyndylary boıynsha qoıyldy.
Repertýardy baıytý jáne jańa qoıylymdardy kórermenge usynýmen qatar, qazaqstandyq teatrlar halyqaralyq mádenı seriktestikti tereńdetýge mán beredi. Jyl basynan beri teatr ujymdary 106 gastrol uıymdastyrdy. Onyń ishinde Reseı, Sıngapýr jáne Túrkııa elderine óner sapary bar. Sonymen qatar otandyq teatr ujymdary Reseı, Ispanııa, Belarýs jáne Túrkııada ótip jatqan halyqaralyq festıvalder men baıqaýlarǵa qatysyp, el óneriniń mereıin asyrýǵa úles qosyp keledi.
Atap aıtqanda, Ystambul qalasynda ótken TÚRKSOI halyqaralyq teatr syılyǵynyń XI marapattaý rásiminde «Astana Opera» teatrynyń rejısseri «Úzdik teatr rejısseri» atalymy boıynsha jeńimpaz atandy. Al Qalıbek Qýanyshbaev atyndaǵy Qazaq ulttyq mýzykalyq drama teatrynyń «Romeo and Juliet» spektakli Sankt-Peterbýrgte ótken XXVII halyqaralyq jastar teatr festıvalinde «Úzdik spektakl» atalymyna laıyq dep tanyldy.
Teatr salasyndaǵy jetistikter memleket tarapynan kórsetilip otyrǵan júıeli qoldaýmen de sabaqtasyp jatyr. Bul baǵyttaǵy jumystar teatrlardyń shyǵarmashylyq áleýetin arttyrýǵa jáne olardyń kásibı damýyna jańa serpin berýge jol ashady. Bıyl Memleket basshysy Maksım Gorkıı atyndaǵy Memlekettik akademııalyq orys drama teatryna «Ulttyq» mártebesi, al Sábıt Muqanov atyndaǵy qazaq sazdy-drama teatryna «Akademııalyq» mártebesi beriletinin aıtty.