Energetıka vıse-mınıstri Suńǵat Esimhanov Shyǵys Qazaqstan oblysynyń turǵyndarymen eseptik kezdesý ótkizip, óńirdiń energetıka salasyndaǵy ahýal men júzege asyp jatqan ınfraqurylymdyq jobalar týraly baıandady, dep habarlaıdy Egemen.kz
Kezdesý barysynda elektrmen jáne jylýmen jabdyqtaý júıeleriniń senimdiligin arttyrý, energetıkalyq ınfraqurylymdy jańǵyrtý máselelerine erekshe nazar aýdaryldy.
Vıse-mınıstrdiń aıtýynsha, 2023–2025 jyldary Rıdder jylý elektr ortalyǵyn jańǵyrtýǵa 20,2 mlrd teńge ınvestısııa salynǵan. Sonyń nátıjesinde jabdyqtardyń tozý deńgeıi 75 paıyzdan 43 paıyzǵa deıin tómendep, qalany jylýmen qamtamasyz etý jaǵdaıy turaqtandyryldy. Al 2026 jyly stansany jańǵyrtýǵa qosymsha 2,6 mlrd teńge bólinip, eki qazandyq pen 3,3 shaqyrym jylý jelisine jóndeý jumystary júrgiziledi.
Kezdesýde О́skemen qalasynda jańa jylý elektr ortalyǵyn salý jobasy da tanystyryldy. «Samuryq-Energo» AQ júzege asyryp jatqan joba aıasynda qýaty 360 MVt elektr energııasyn jáne saǵatyna 1000 Gkal jylý óndiretin jańa stansa boı kótermek. Bul nysan О́skemendegi qazirgi jylý energııasy tapshylyǵyn tolyq óteýge múmkindik beredi.
Jańa JEO qurylysy úshin qalanyń sol jaǵalaýynan arnaıy jer telimi bólingen. Joba zamanaýı taza kómir tehnologııalaryn paıdalanýdy kózdeıdi. Qazirgi ýaqytta qurylys alańyn daıyndaý jumystary júrgizilip jatyr. Nysandy 2029 jyldyń sońyna deıin aıaqtaý josparlanǵan.
Jumys sapary aıasynda Suńǵat Esimhanov Rıdder JEO-daǵy jóndeý naýqanynyń barysymen tanysyp, aldaǵy jylytý maýsymyna daıyndyq jumystaryn tekserdi.