Qazaqstanda Memleket basshysy Qasym-Jomart Toqaevtyń bastamasymen mádenı ınfraqurylymdy damytý jáne mádenıet mekemeleriniń qyzmetin kópshilikke keńinen usyný baǵytyndaǵy jumystar turaqty túrde júzege asyrylady, dep habarlaıdy Egemen.kz
Búginde elimizde 7 445 mádenıet uıymy bar. Bul salada 56 myńnan astam maman jumys isteıdi. Memleket jańa mádenıet nysandaryn salýǵa, qoldanystaǵy mekemelerdi jańǵyrtýǵa jáne olardyń materıaldyq-tehnıkalyq áleýetin nyǵaıtýǵa júıeli túrde kóńil bólip keledi.
Keıingi bes jylda elimizde 274 mádenıet nysany paıdalanýǵa berilip, taǵy 1 293 nysanǵa jóndeý jumystary júrgizildi. Al 2026 jyly 64 nysannyń qurylysy jalǵasyp, taǵy 130 nysan jańartylyp jatyr.
Teatr ónerin damytý – saladaǵy negizgi basymdyqtyń biri. Keıingi jyldary Astana, Túrkistan jáne Petropavl qalalarynda jańa teatr ǵımarattary salyndy. Qazir Aqtóbe men Qonaev qalalarynda drama teatrlarynyń qurylysy jalǵasyp jatyr. Sonymen qatar Shymkent, Qyzylorda jáne Semeı qalalarynda jańa teatrlar salý josparlanǵan. Buǵan qosa Muhtar Áýezov atyndaǵy Qazaq ulttyq drama teatry men Natalııa Sas atyndaǵy orys memlekettik akademııalyq balalar men jasóspirimder teatry ǵımarattaryn jańǵyrtý jumystary júrgizilip jatyr.
Mýzeı salasynda da birqatar joba qolǵa alyndy. 2025 jyly Astanada jańa О́ner mýzeıi ashyldy. Túrkistan jáne Almaty oblystarynda «Saýran», «Gaýhar ana» jáne «Esik» vızıt-ortalyqtarynyń qurylysy jalǵasyp jatyr. Sonymen qatar kóne Bozoq qalashyǵynyń negizinde ashyq aspan astyndaǵy ulttyq park qurý jobasy júzege asyrylyp jatyr.
Ábilhan Qasteev atyndaǵy ulttyq óner mýzeıi, Almatydaǵy Ortalyq memlekettik mýzeı jáne Abaı atyndaǵy Qazaq ulttyq opera jáne balet teatry jańartyldy. Mundaı jobalar tarıhı-mádenı murany saqtaýǵa qolaıly jaǵdaı jasap qana qoımaı, kórme jáne sahna jumystarynyń sapasyn arttyrýǵa da múmkindik beredi.
Saladaǵy basty baǵyttardyń biri – mádenıet úılerin damytý. Bul maqsatta «Qazaqstan halqyna» qoǵamdyq qorymen birlesip, óńirlerdegi mádenıet oshaqtarynyń materıaldyq-tehnıkalyq bazasyn nyǵaıtý jumystary júrgizilip jatyr.
Mádenı ınfraqurylymdy damytý bilikti mamandar daıarlaý isimen de tyǵyz baılanysty. Osy baǵytta Almaty qalasynda shyǵarmashylyq baǵyttaǵy oqý oryndary stýdentterine arnalǵan 500 oryndyq jataqhananyń qurylysy bastaldy. Aleksandr Seleznev atyndaǵy Almaty horeografııalyq ýchılıshesiniń ǵımaraty jańǵyrtylyp jatyr. Budan bólek Almaty men Astanadaǵy úsh mamandandyrylǵan mýzyka mektebine arnalǵan jańa ǵımarattar salý máselesi pysyqtalady.
Memleket basshysynyń tapsyrmasyna sáıkes, Shymkent qalasynda jańa Mádenıet jáne óner ýnıversıtetin qurý jumystary qolǵa alyndy. Jańa oqý ornynda mádenıet salasyndaǵy zamanaýı jáne tehnıkalyq mamandyqtardy damytýǵa basymdyq berilmek.
Sonymen qatar Petropavl qalasynda Kúlásh Baıseıitova atyndaǵy Qazaq ulttyq óner ýnıversıtetiniń fılıalyn ashý jobasy júzege asyrylyp keledi. Bul bastamalar sapaly bilimge jol ashyp, mádenıet salasynyń kadrlyq áleýetin nyǵaıtýǵa múmkindik beredi.