Oblys ortalyǵyndaǵy saıabaqta jyl saıyn «Bir otbasynda turamyz» atty jazǵy festıval ótedi. Bıyl dostyq toıy Astananyń 20 jyldyǵyna arnaldy. Merekeni bolgar ashsa, estafetany «Elbrýs» qarashaı-cherkes jáne qabarda-balqar etnomádenı birlestikteri jalǵastyrdy.
Kelesi kezekte saıabaqta Koreı etno-mádenı birlestiginiń ókilderi qalalyqtardy merekelik baǵdarlamalaryna shaqyrdy. Merekege óńirdegi Ýspen, Pavlodar aýdandaryndaǵy birlestik bólimsheleri, Almatydaǵy Koreıler ortalyǵynan kelgen qurmetti qonaqtar qatysty.
Bul kúni saıabaqta koreı ánderi men bıleriniń konserttik baǵdarlamasy kórsetilip, erekshe qolóner týyndylarynyń kórmesi ashyldy. Qala turǵyndary men qonaqtary koreı halqynyń ulttyq taǵamdarynan dám tatty. Búginde óńirde 24 etnomádenı birlestik qyzmet jasaıdy. Solardyń qatarynda «Qazaqstan koreıleri assosıasııasy» qoǵamdyq birlestiginiń oblystyq fılıaly da bar.
Oblystyq fılıal tóraǵasynyń orynbasary Raısa Afanaseva-Kımniń aıtýynsha, bizdiń óńirde qazir 1000-ǵa jýyq koreı ómir súrýde. Búginde qaýymdastyq Qazaqstan-Koreıa bilim berý ortalyǵymen tyǵyz baılanys ornatqan. Ortalyq birlestik múshelerine koreı tilinde kitaptar, oqýlyqtar joldaıdy. Elimizdegi Koreıa elshiliginiń mádenı ortalyǵymen birlese qyzmet jasap keledi.
Raısa Kımniń aıtýynsha, jalpy, qazaqtar men koreılerdi jaqyndastyratyn ortaq rýhanı-mádenı baılanystar da az emes. Mysaly, qazaqtyń dombyrasy men jetigenine uqsas ulttyq aspaptary koreı halqynda da bar. Koreıler de balanyń tusaýyn bir jasqa tolǵanda kesip, týystardy dastarqan basyna jınaıdy eken. Keıbir sózderimiz de uqsas. Bizdegideı úlkenderge qurmet kórsetý tárbıesi qalyptasqan.
Al, birlestiktiń bir ereksheligi, onyń quramynda koreılermen qatar, qazaq, orys, grýzın sııaqty ult ókilderi de bar. Olardy koreı halqynyń ótken tarıhy, mádenıeti, ánderi, bıleri, taǵamdary qatty qyzyqtyrady eken. Koreı halqynyń Jańa jyl merekesi-Solnaldy da birge toılaıdy. Merekeni tabıǵattyń jańarýymen, kóktemniń kelýimen baılanystyrady. Balalardyń ata-analaryn merekemen quttyqtaý salty «sebe» dep atalady. Úlkender ulttyq kıimderi hanbokty kıip, olarǵa «toktam» saltymen bata beredi. Konsert júrgizýshileri osy jáne taǵy basqa ádet-ǵuryptar jóninde baıandap, keıbireýlerin sahnada kórsetti.
– Elimizde turatyn árbir ult ókilderi qazaq halqynyń salt-dástúrin bilýi tıis dep esepteımin. Bul – syılastyq belgisi. Jergilikti ýnıversıtet stýdentteri Narzangúl Kanapına, Qymbat Muqanova mysaly, koreı ánderin oryndaıdy. О́zgege degen qurmettiń, ózara yntymaqtyń arqasynda ulttar arasynda dostyq qarym-qatynas osylaı saqtalyp keledi. Astanamyz osy baqytty birliktiń sımvoly, – deıdi Raısa Afanaseva-Kım.
Saıabaqqa jınalǵan jurtshylyq Gúlnár Aýtalypova kórkemdik jetekshilik etetin «Anen» ansambli oryndaǵan koreı ulttyq bılerin qyzyqtady.
Saıabaqtaǵy konserttik baǵdarlamada etnomádenı birlestik quramyndaǵy «Kympıtsorı» vokaldyq toby, «Anıon» horeografııalyq ujymy, «Bı ıýnıks» bı ansamblderi tamasha óner kórsetti.
Farıda BYQAI, «Egemen Qazaqstan»
PAVLODAR