Astanada 14-shildeden bastap ótip jatqan halyqaralyq sáýletshiler kongresi keshe aıaqtaldy. Bir sózben aıtqanda, sheteldik kásibı tájirıbege súıene otyryp zamanaýı otandyq sáýlet ónerin damytý maqsatynda uıymdastyrylǵan bul ıgi shara týraly gazetimizdiń ótken sanynda jazǵan bolatynbyz. Endi shara qorytyndysy men kongresi aıasynda kóterilgen birqatar usynystar týraly aıta ketsek.
Kongrestiń ashylýynda Mádenıet jáne sport vıse-mınıstri Aqtoty Raıymqulova: «Biz búkil álem sáýletshileriniń shyǵarmashylyǵyna zor qurmet bildire otyryp, árdaıym jańa jobalardy qýana kútemiz, elimiz eń sáýletti elderdiń biri bolýy úshin jumys isteýge árdaıym ázirmiz» degen edi.
Soǵan oraı jas sáýletshiler men stýdentter arasynda startap ýıkend formatynda «Qalalyq orta: «aqyldy» aýdan» baıqaýynyń ótip jatqanyn da aıtqan bolatynbyz. Qorytyndy jıynda baıqaý jeńimpazdary marapattaldy.
Sonymen turǵyndar úshin qysqy jylyjaı keshenderin jasaýdy usynǵan «Sredalab» komandasy gran-prı ıelendi. Al qaladaǵy kólik turaqtary úshin AirBnB balamasyn jasaýdy usynǵan «Nurcelona» komandasy birinshi oryndy alsa, qalalyq drenaj júıelerin usynǵan «RainTech» komandasy ekinshi oryn ıegeri atandy. Múmkindigi shekteýli jandar úshin AT-mektep qurýdy usynǵan «AT mektebi» komandasy úshinshi oryndy enshiledi. «King Wins» komandasy bolsa Astana ákiminiń arnaıy syılyǵymen marapattaldy.
Astana Innovations basqarma tóraǵasy Oljas Sartaev jeńimpazdardyń óz ıdeıalaryn «aqyldy» aýdan jobasy aıasynda iske asyrýǵa múmkindikteri bolatynyn aıta kelip: «Búginde «Jastar» shaǵyn aýdanynda úsh baǵyt boıynsha birneshe tehnologııa engizilgen. Mysaly jylyjaı keshenderi týraly aıtsaq. Olardy iske asyrý úshin úsh-tórt aı ýaqyt kerek. Biz óz tarapymyzdan baǵalap, bıyl eń bolmasa bir jylyjaıdy shaǵyn aýdanǵa shyǵarýǵa tyrysamyz», dedi.
Osy shara aıasynda Astana qalasy ákiminiń orynbasary Malıka Bekturova da qaladaǵy «aqyldy» júıe turǵyndar úshin qalaı qolaıly bolýy kerektigi týraly aıtyp: «Biz alǵash ret sáýletshiler kongresi men «aqyldy» qala boıynsha bóligin Astananyń damýdyń kelesi kezeńine ótkenin kórsetý úshin biriktirdik. Bul jaı ǵana qurylystar emes, úı «aqyldy» bolýy úshin endi biz energııalyq tıimdi ǵımarattar salyp, materıaldardy, ozyq tehnologııalardy paıdalanǵymyz keledi. Qala ósip kele jatyr, onyń tıimdiligi de arta túsýi tıis», degen bolatyn.
Jan-jaqty talqylaý, qyzý pikirtalas, jańa tehnologııa múmkindikteri týdyrǵan nebir ozyq oılar ortaǵa salynǵan atalmysh jıyn sońyna da kelip jetti. Mádenıet jáne sport mınıstrligi jınalys zalynda kongress jumysynyń qorytyndysyna arnalǵan baspasóz konferensııasy ótti.
Jınalys tizginin alǵan Sáýletshiler odaǵy halyqaralyq qaýymdastyǵynyń prezıdenti Serik Rústembekov sózin: «Sáýlet óneri osy ómirdegi bar ónerdiń «anasy» bolyp tabylady. Sýret salý, músin jasaý bolsyn olardyń barlyǵy bastaýyn sáýlet ónerinen alady. Jalpy, kúni búginge deıin Mádenıet mınıstrliginiń basshylyǵyna olar bizben durys jumys istemeıdi dep shaǵymdanatynbyz. Búginde bul olqylyqtyń orny toltyryldy. Mádenıet jáne sport mınıstrligi Astananyń 20 jyldyǵyn atap ótý aıasynda bizdiń osyndaı aýqymdy shara ótkizýimizge kómektesti. Bolashaqta bul dástúrge aınalady degen oıdamyz», degen rızashylyq leppen bastady. Ári qaraı tórt kún boıy ótken jıynda sáýlet óneri salasyndaǵy zamanaýı tendensııalar jáne ózge de kóptegen taqyryptar sóz bolǵanyn qysqasha aıtyp ótti.
«О́tken júz jyldyqta jáne 21 ǵasyrda japan dalada salynǵan qalalar saýsaqpen sanarlyqtaı. Mysaly Aýstralııadaǵy Kandra, Brazılııanyń jańa qalasy – Brazılııa jáne bizdiń Astana. Kongrestiń jumysy barysynda osy úsh qalanyń arasyndaǵy úndestik pen aıyrmashylyq ózara salystyryldy. Shetelden kelgen sarapshylardyń barlyǵy derlik Astananyń sáýletine rızashylyqtaryn bildirip otyr», dedi ol.
Sonymen birge sáýletshiler kongresinde Eýrazııa sáýletshiler akademııasyn qurý bastamasy kóterilgenin tilge tıek etti.
Ularbek NURǴALYMULY,
«Egemen Qazaqstan»