Úndistannyń astanasy – Nıý-Delıde kúres túrlerinen ótken jastar arasyndaǵy Azııa birinshiligi óz máresine jetti. Buǵan deıin biz jarysty jeti júldemen (2 altyn+5 qola) qorytyndylaǵan Qazaqstannyń grek-rım kúresi sheberleri komandalyq esepte ekinshi oryn alǵany jaıynda baıandaǵanbyz.
Qyzdar saıysynda jerlesterimiz 1 altyn jáne 3 qola medaldi ıelendi. Bas júlde 62 kılo salmaq dárejesinde beldesken Irına Kýznesovanyń enshisinde. Áskerılerdiń ortalyq sport klýbynyń ókili shırek fınalda jergilikti sportshy Anshý Anshýdan aılasyn asyrsa, jartylaı fınalda qytaılyq Sınıasan Sýnnan úsh upaı aıyrmashylyǵymen utylyp jatyp, sheshýshi sátte qarsylasyn qos jaýyrynymen jerge qadady. Fınalda Irına japonııalyq Rın Kondony qapy qaldyrdy.
Erkin kúres sheberleri arasyndaǵy jarysta Qazaqstan quramasy 2 kúmis jáne 3 qola medaldi qorjynǵa saldy. Aqtyq synǵa alqynbaı jetken Talǵat Syrbaz (61 kılo) sheshýshi tusta ózbekstandyqtan utylsa, Serik Baqytjanov (97 kılo) Iran balýanyna jol berdi. Al Nurǵoja Qaıpanov (70 kılo), Erǵalı Álisher (92 kılo) jáne Omar Eıýbov (125 kılo) qola medaldi ıemdendi.
Ǵalym SÚLEIMEN,
«Egemen Qazaqstan»
Almaty